ڪراچي (ويب ڊيسڪ) ڏکڻ آفريڪي ڪرڪيٽ ٽيم جي اڳوڻي فاسٽ بالر ورنن فلينڊر تجربيڪار پاڪستاني اسپنر ۽ ٽيسٽ ڪرڪيٽر نعمان عليءِ کي ساراهيندي کيس پاڪستان ڪرڪيٽ لاءِ رول ماڊل قرار ڏئي ڇڏيو.
هڪ انٽرويوءَ ۾ پاڪستان ڪرڪيٽ ٽيم جي اڳوڻي بالنگ ڪنسلٽنٽ ورنن فلينڊر ٽيسٽ ڪرڪيٽ ۾ نعمان علي جي تسلسل سان ڪارڪردگي ۽ نظم ۽ ضبط کي ساراهيندي چيو ته ” اسان تجربي جي ڳالهه ڪيون ٿا، پر تجربو تڏهن ئي اهم آهي جڏهن توهان ميدان ۾ پرفارم ڪريو ٿا.“
ورنن فلينڊر چيو ته نعمان علي پاڪستان ڪرڪيٽ لاءِ بهترين رول ماڊل آهي، گذريل ڏيڍ ورهين دوران هو بهترين فارم ۾ آهي، بالنگ ۾ جنهن طريقي سان هو ڪنٽرول رکي ٿو، اهو ننڍي کنڊ ڪنڊيشنز لاءِ نهايت اهم آهي.
فلينڊر نعمان علي جي درست لائين ۽ لينٿ جي واکاڻ ڪندي چيو ته کيس ٽارگيٽ ڪرڻ سولو ناهي، هو بيٽر کي تمام گهٽ موقعو ڏئي ٿو ۽ بيٽر کي سندس خلاف کيڏندي تمام محتاط رهڻو پوي ٿو.
واضح رهي ته 39 ورهين جو نعمان علي هن وقت پاڪستان ٽيسٽ ٽيم جو اهم بالر آهي، هن ڊگهي فارميٽ ۾ 21 ٽيسٽ ميچن ۾ گرين شرٽس جي نمائندگي ڪندي 97 وڪيٽون حاصل ڪيون آهن.
