لنڊن(انيق ناجي)خواجا آصف، جيڪو اڳ ۾ ئي پنهنجي تڪراري ماضي سبب تنقيد هيٺ آهي، هن ڀيري آمريڪي صحافي مهدي حسن کي انٽرويو ڏئي ويٺو، مهدي حسن هڪ انتهائي قابل صحافي آهي، جيڪو اڪثر مغربي ۽ اسرائيلي ترجمانن کي مناظري ۾ لاجواب ڪري ڇڏي ٿو۔ اهڙي شخص آڏو خواجه آصف جهڙي وزير دفاع جو وڃڻ ۽ پاڻ کي مڪمل طور بي نقاب ڪرائڻ قومي سطح تي شرمندگي آهي۔انٽرويو دوران نه آصف جي انگريزي ڪم آئي، نه دليل، نه ئي اکيون مٿي ڪرڻ جي همت۔ مهدي حسن سندس هر هڪ ڳالهه کي غلط ثابت ڪيو ۽ کيس لاوارث بڻائي ڇڏيو۔ نتيجي ۾ جيڪو وقار پاڪستان کي وائٽ هائوس ۾ ملاقات کان پوءِ مليو هو، اهو وقار هڪ انٽرويو ۾ ختم ٿي ويو، ڀارتي ميڊيا به ان موقع کي هٿ ڪيو ۽ پاڪستان کي مذاق بڻائي ڇڏيو۔ٻيو تماشو شمع جوڻيجو جي حوالي سان ٿيو، جيڪا هڪ عام شهري ۽ سماجي ڪارڪن آهي، پر کيس وزيراعظم جي وفد ۾ شامل ڪيو ويو۔ خود پرڏيهي وزارت۽ وزارت دفاع به لاتعلقي ڪري ڇڏي ته اسان کي ئي خبر ناهي هي ڇو آئي۔ سوال اٿيو ته پوءِ کيس نمائندگي ڪنهن جي حيثيت سان ڏني وئي؟پوءِ عجيب وضاحتون آيون ته هوءَ شايد وزيراعظم جي تقرير لکندڙ هئي، پر ڪنهن به ادارو ان جي ذميواري نه کنئي۔ اهڙي غير ذميواري سان پاڪستان، جيڪو عالمي سطح تي نئين اهميت حاصل ڪري رهيو هو، ان جي ساک کي وڏو ڌڪ لڳو۔پاڪستان کي ڪڏهن ڪڏهن ئي عالمي سطح تي عزت ملندي آهي، پر اها عزت اسان جا حڪمران پنهنجن نااهلي ۽ غير ذميواري سبب پاڻ ئي هٿان وڃائي ڇڏين ٿا۔ خواجه آصف جو انٽرويو ۽ شمع جوڻيجو وارو تماشو ٻنهي ملايو ته نتيجو صاف آهي: هڪ مڪمل قومي شرمندگي۔ان حالتن ۾ سوال اٿيو ٿو ته جيڪڏهن پاڪستان کي مستقبل ۾ ڪو وڏو ڪردار مليو به، ته ڇا اهڙا غير هم آهنگ ۽ غير ذميوار حڪمران ان کي سنڀالي سگهندا؟
