ايران جي صدر جو پاڪستان ڏانهن هي دورو ٻنهي ملڪن جي برادراڻن لاڳاپن جي مضبوطيءَ جو واضح ثبوت آهي. گذريل سال، سوا سال جي عرصي دوران ايران طرفان ڪنهن ٻئي صدر جو پاڪستان جو دورو ڪرڻ وڏي اهميت جو حامل عمل آهي. تازو ئي ايران ۽ اسرائيل وچ ۾ ٻارهن ڏينهن تائين هلندڙ جنگ دوران پاڪستان جنهن همت، بيباڪي ۽ وضاحت سان اسرائيل جي جارحيت جي مخالفت ڪندي ايران جي حمايت ڪئي، ان تي ايران پنهنجي دل جي گهراين سان شڪرانو ادا ڪيو آهي. ان شڪريي جي گونج ايتري ته واضح هئي جو اها ايراني پارليامينٽ جي ايوانن تائين به پهتي.
ايراني صدر جي ٻن ڏينهن واري دوري دوران، پاڪستان ۾ پاڪستان تحريڪ انصاف پاران 5 آگسٽ 2025 تي ٿيندڙ احتجاجن جون صدائون به گونجي رهيون هيون. يقيناً اهي صدائون ايراني انتظاميا جي ڪنن تائين به پهتيون هونديون، ۽ ممڪن آهي ته انهن آوازن ڪنهن به طور سان خوشگوار تاثر نه ڇڏيو هجي. نٿو سمجهي سگهجي ته اهو تحريڪ انصاف جي "ڊي اين اي” ۾ لکيل آهي يا ان جي تقدير ۾، جو جڏهن به ڪا اهم عالمي شخصيت پاڪستان جي دوري تي ايندي آهي يا ملڪ ۾ موجود هوندي آهي، تحريڪ انصاف جو احتجاجي طوفان شروع ٿي ويندو آهي.تحريڪ انصاف جي هن ورجائجي ويل طريقي ڪار هن جماعت جي چهري تان سنجيدگيءَ جي چمڪ گهٽائي ڇڏي آهي. جڏهن ايراني صدر پاڪستان ۾ لهڻ وارا هئا، تڏهن تحريڪ انصاف اسلام آباد ۾ حڪومت خلاف هڪ اي پي سي ڪوٺائي شور شرابو ڪري رهي هئي. ان اي پي سي جو جيڪو بيان جاري ٿيو، ان جي سٽن جي وچ ۾ به 5 آگسٽ جي احتجاج جا ارادا ۽ هدف صاف نظر اچي رهيا هئا. انهن جو بنيادي مقصد شايد هي آهي ته باني تحريڪ انصاف کي ڪنهن به قيمت تي جيل مان آزاد ڪرايو وڃي.
5 آگسٽ کان اڳ باني جماعت ۽ سندن قيد ٿيل ساٿين بابت جيڪي لڳاتار فيصلا سامهون آيا، انهن جي پس منظر ۾ ته لڳي ٿو ته احتجاجي ويڙهه لاءِ تيار تحريڪ انصاف جي اڳواڻ جي آزادي ممڪن ناهي. پي ٽي آءِ هاڻ پنهنجي اڳواڻ جي آزادي لاءِ آمريڪا جي وساطت تي به اميدون ٻڌي ڇڏيون آهن. ان جو اندازو ان مان به لڳائي سگهون ٿا ته باني تحريڪ انصاف جي پٽ، قاسم خان، پهرين آگسٽ 2025 تي برطانوي صحافي پيئرس مورگن کي انٽرويو ڏيندي چيو ته: "آمريڪي صدر ڊونلڊ ٽرمپ اهڙي شخصيت آهن، جيڪي منهنجي قيد والد جي ڪيس ۾ فرق وجهي سگهن ٿا.”
ٻين لفظن ۾، قاسم خان آمريڪي صدر کان درخواست ڪري رهيا آهن ته هو پاڪستاني عدالتن جي ڪمن ۾ مداخلت ڪري سندن والد کي آزاد ڪرائن. سوال هي آهي ته ڇا اهڙي ڳالهه ممڪن به آهي؟ قاسم ۽ سليمان آمريڪي صدر کي عرض ته ڪن پيا، پر پاڻ پاڪستان اچي 5 آگسٽ جي احتجاج جي اڳواڻي ڪرڻ جي نه سگهه رکن ٿا، نه جرئت.
هاڻي ٻڌڻ ۾ پيو اچي ته ٻئي پٽ پاڪستاني ويزا لاءِ درخواست ڏني آهي. اميدن جي بار بار ناڪامين جي باوجود، تحريڪ انصاف جا پاڪستاني عاشق پنهنجن ظاهر و لڪل مقصدن جي حاصلات لاءِ 5 آگسٽ جي احتجاجي مظاهري کي ڪامياب بنائڻ چاهين ٿا. جماعت جا مرڪزي سيڪريٽري جنرل سلمان اڪرم راجه پشاور وڃي اعلان ڪن ٿا ته: "5 آگسٽ 2025 تي تحريڪ انصاف ملڪ گير احتجاج ڪندي.”
"ملڪ گير احتجاج” جي لفظن ۾ بيشڪ رومانيت ۽ دلڪشي آهي، پر انهن لفظن کي عمل جي روپ ۾ آڻڻ ايترو سولو ڪم نه آهي. هاڻ 5 آگسٽ اچي چڪو آهي، ميدان به سامهون آهي ۽ امتحان به. "ملڪ گير احتجاج” جو اعلان ڪندڙن لاءِ اهو ڏينهن سندن عملي نيتن جو پرکڻ جو ڏينھن هوندو. تحريڪ انصاف کي احتجاج جو آئيني ۽ قانوني حق حاصل آهي، ۽ هو ان حق کي استعمال به ڪري سگهي ٿي، پر خدشو آهي ته جڏهن به جماعت جا ڪارڪن هي حق استعمال ڪندا آهن ته قانون جي واٽي تي هلڻ بدران قانون کان ٽري وڃن ٿا، پاڻ به مصيبت ۾ پون ٿا ۽ بيگناهه عام ماڻهن لاءِ به تڪليف پيدا ڪن ٿا. هاڻ ته اهو تحريڪ انصاف جو "ٽريڊ مارڪ” بڻجي چڪو آهي.
بهتر ٿيندو ته تحريڪ انصاف ۽ ان جي قيادت صاف صاف لفظن ۾ چئي ته 5 آگسٽ جي احتجاج جو اصل مقصد ڇا آهي: باني جي آزادي! باني پاڻ به مبينا طور ڪنهن "ڊيل” تحت آزادي وٺي پنهنجي پسند جي مغربي ملڪ وڃڻ چاهين ٿا، جڏهن ته حڪومت مبينا طور تي کين ڪنهن خليجي ملڪ موڪلڻ چاهي ٿي. گذريل ڏينهن مملڪتي وزير، حذيفه رحمان، هڪ نجي ٽي وي چينل تي ان بابت خاص انڪشاف به ڪيو آهي.
