راولپنڊي(م ڊ) آرمي چيف فِيلڊ مارشل سيد عاصم منير چيو آهي ته پاڪ فوج بدلجندڙ جنگي حالتن ۾ فيصلائتي برتري برقرار رکندي. پاڪ فوج جي تعلقات عامه واري شعبي (آءِ ايس پي آر) موجب، سپه سالار ملتان گيريزن جو دورو ڪيو ۽ جديد Z-10ME اٽيڪ هيليڪاپٽر جي پاڪ فوج ۾ شموليت جي تقريب ۾ شرڪت ڪئي. فِيلڊ مارشل علمي ۽ سماجي شخصيتن سان ملاقات ڪندي سول ۽ فوجي هم آهنگي ۽ گڏيل خطرن کي منهن ڏيڻ لاءِ گڏيل ڪوششن جي اهميت تي زور ڏنو. فِيلڊ مارشل سيد عاصم منير کي ملتان گيريزن جي دوراني فارمِيشن جي تيارين ۽ جاري تربيتي سرگرمين بابت بريفنگ ڏني وئي، جتي هن جوانن جي اعليٰ جذبي، پيشوراڻه صلاحيت ۽ جنگي مهارتن جي واکاڻ ڪئي. فِيلڊ مارشل جو علمي ۽ سماجي حلقن سان ڳالهه ٻولهه جو سيشن پڻ ٿيو، جتي سيد عاصم منير قومي يڪجهتي، سول-ملٽري هم آهنگي ۽ هائبرڊ خطرن کي منهن ڏيڻ لاءِ سڀني طبقن جي گڏيل ڪوششن جي اهميت تي زور ڏنو. فِيلڊ مارشل گڏيل هٿيارن جي حڪمتِ عملي جي ڪامياب مظاهري کي ساراهيو.
