ڪراچي (ويب ڊيسڪ) ڪراچي جي علائقي گلشن اقبال ۾ هڪ رهائشي فليٽ مان ملندڙ لاش سينيئر اداڪارا عائشا خان جو آهي، پوليس سندس سڃاڻپ جي تصديق ڪري ڇڏي آهي.
پوليس موجب، اداڪارا جو لاش هفتو پراڻو آهي، هوءَ گهر ۾ اڪيلي رهندي هئي، لاش مان ڌپ اچڻ تي پاڙي وارن سندس مائٽن کي اطلاع ڏنو، جنهن بعد پوليس موقعي تي پهچي سندس مڙهه تحويل ۾ ورتو.
اداڪارا عائشا خان جو لاش جناح اسپتال کان سراب ڳوٺ ايڌي سردخاني منتقل ڪيو ويو آهي.
واضح رهي ته خميس ڏينهن عائشا خان جي دوست ۽ ساٿي فنڪارا تهمينا خالد سندس لاڏاڻي جي تصديق ڪئي هئي.
هڪ نجي ٽي وي سان ڳالهائيندي هن ٻڌايو ته عائشا خان پنج ڏينهن اڳ ئي ڪراچيءَ ۾ لاڏاڻو ڪري وئي هئي.
واضح رهي ته اداڪارا عائشا خان جي عمر 77 سال هئي، هن ڪيترن ئي يادگار ڊرامن جهڙوڪ افشان، عروسه، فيملي 93، مهندي ۽ ٻين ۾ اداڪاري جا جوهر ڏيکاري چڪي هئي.
هوءَ گذريل ڪجهه سالن کان ڊرامن پري هئي، جڏهن ته مرحومه پاڪستان ٽيليويزن جي مشهور اداڪارا خالده رياست جي وڏي ڀيڻ هئي.
