حيدرآباد(رپورٽ: اعجاز چانڊيو) سنڌ جي گورنر ڪامران ٽيسوري چيو آهي ته آئون سنڌ جي عوام کي قسم کڻي ٻڌايان ٿو ته ڪئنالن واري معاملي تي سياست ٿي رهي آهي، گورنر هائوس جا در کليل آهن، سموريون پارٽيون گورنر هائوس ۾ ويهي ڳالهيون ڪن، جيڪڏهن ضرورت آهي ته ڪينال ٺهڻ گهرجن، جيڪڏهن ضرورت ناهي ته نه ٺهڻ گهرجن، پر سڀ کان پهريان ڪينالن واري معاملي تي سياست بند ڪرڻ گھرجي، هڪ هفتي لاءِ ڊي ايس پي ٽريفڪ منهنجي حوالي ڪيو وڃي ته ڪو به ماڻهو ڪراچي ۾ ڊمپر هيٺيان اچي نه مرندو. اهڙن خيالن جو اظهار هن ڪالهه لطيف آباد ۾ سحري جي تقريب ۾ شرڪت کان پوءِ صحافين سان ڳالهائيندي ڪيو. هن چيو ته جيڪڏهن گورنر هائوس حيدرآباد ۾ هجي ها ته ان جا دروازا عوام لاءِ 24 ڪلاڪ ئي کليل هجن ها، ڪراچي وانگر جلد ئي حيدرآباد جا 50 هزار نوجوان به آءِ ٽي جو ڪورس ڪري سگهندا. هن چيو ته حيدرآباد سنڌ جو ٻيو نمبر وڏو شهر آهي، جيڪو ٽيڪس ادا ڪندو آهي، پر هتي نه رستا ٺيڪ آهن نه ئي صحت جي حالت درست آهي، ڪراچي ۽ حيدرآباد جو ميئر سئو ارب جو پيڪيج مون وٽ کڻي اچن ته مان وفاق سان ڳالهائي فنڊ وٺي ڏيندس،
