اسلام آباد (م ڊ) موسميات کاتي سنڌ، بلوچستان ۽ پنجاب ۾ سوڪهڙي جو الرٽ جاري ڪري ڇڏيو. الرٽ موجب اوڀر جي ميداني علائقن ۾ سوڪهڙي جون حالتون رهنديون. مارچ 2025 دوران، ملڪ جي هيٺين اڌ ۾ سراسري گرمي پد معمول کان 2 کان 3 درجا سينٽي گريڊ وڌيڪ هو. ڏکڻ جي ڪجهه علائقن ۾ 200 ڏينهن کان وڌيڪ مسلسل خشڪ موسم رهي. سنڌ ۾، پڊعيدن، شهيد بينظير آباد، دادو، ٿرپارڪر، عمرڪوٽ، خيرپور، حيدرآباد، ٺٽو، بدين ۽ ڪراچي ۾ وچولي سوڪهڙي جڏهن ته گهوٽڪي، جيڪب آباد، لاڙڪاڻي، سکر، خيرپور ۽ سانگهڙ ۾ هلڪي سوڪهڙي جو امڪان آهي. بلوچستان ۾، گوادر، ڪيچ، لسٻيلا، پنجگور ۽ آواران ۾ خشڪي جي صورتحال وچولي رهندي، جڏهن ته چاغي، جعفرآباد، جهل مگسي، سبي، نوشڪي ۽ واشڪ ۾ خشڪي جي صورتحال هلڪي رهندي. پنجاب ۾، بهاولنگر، بهاولپور ۽ رحيم يار خان متاثر علائقا هوندا. الرٽ ۾ چيو ويو ته پي ايم ڊي جو نيشنل ڊارٽ مانيٽرنگ اينڊ ارلي وارننگ سينٽر (اين ڊي ايم سي) صورتحال جي نگراني ڪري رهيو آهي. ايندڙ مهينن ۾ برساتن جي گهٽتائي ۽ وڌندڙ گرمي پد جي ڪري فوري سوڪهڙي جو امڪان آهي. ان ۾ برساتن، گرمي پد، هوا ۽ گرمي پد ۾ تبديلين جي ڪري تيزي ايندي آهي. پهرين سيپٽمبر 2024 کان 21 مارچ 2025 تائين ڪل برسات معمول کان 40 سيڪڙو گهٽ هئي. پي ايم ڊي موجب، تربيلا ۽ منگلا ڊيمن ۾ پاڻي جي کوٽ آهي ۽ مختلف درياهن ۾ وهندڙ پاڻي انتهائي گهٽ سطح تي آهي. تربيلا ڊيم جي موجوده سطح 1402 فوٽ ۽ منگلا ڊيم جي موجوده سطح 1061.75 فوٽ آهي، ٻئي ڊيم ڊيڊ ليول تي آهن. هڪ تازي رپورٽ ۾، اين ڊي ايم سي چيو ته 15 کان 21 مارچ جي هفتي دوران رڪارڊ ڪيل سراسري گرمي پد سراسري کان 1 کان 7 درجا وڌيڪ هو، ان سان مٽيءَ ۾ گهم جي سطح گهٽجي ٿي. رپورٽ ۾ وڌيڪ چيو ويو ته گرمي پد ۾ هي واڌ پاڻي جي گهرج ۾ واڌ ڪندي، فصلن تي ناڪاري اثر وجهندي ۽ اڳ ۾ ئي گهٽ آبي وسيلن تي واڌو دٻاءُ پوندو. موسميات کاتي موجب 24 کان 30 مارچ تائين ملڪ جي اڪثر علائقن ۾ موسم خشڪ رهندي، جڏهن ته 26 مارچ تي خيبرپختونخواهه، گلگت بلتستان، آزاد ڪشمير ۽ اتر بلوچستان ۾ مينهن، هوائون ۽ جبلن تي برفباري جو امڪان آهي.
