راولپنڊي(م ڊ) تحريڪ انصاف جي باني چيئرمين عمران خان سان خيبر پختون خواهه جي وڏي وزير علي امين گنڊاپور ملاقات ڪئي، جنهن ۾ صوبي جي سياسي صورتحال، امن امان ۽ پارٽي معاملن تي خيالن جي ڏي وٺ ڪئي وئي، علي امين گنڊاپور کانسواءِ سهيل آفريدي، حليم عادل شيخ، برگيڊيئر رٽائرڊ مصدق عباسي، سيمبيا طاهر، مشتاق غني ۽ تيمور جهڳڙا نه عمران خان سان ملاقات ڪئي، ذريعن موجب عمران خان سان ملاقات ۾ علي امين گنڊاپور شير افضل مروت جي پارٽي مان نيڪالي جو معاملو به اٿاريو ۽ شير افضل مروت کي پارٽي مان ڪڍڻ واري فيصلي تي نظرثاني جي درخواست ڪئي، ملاقات ڏيڍ ڪلاڪ تائين جاري رهي، جيڪا اڊيالا جيل جي ڪانفرنس روم ۾ ڪئي وئي.
شير افضل بابت عمران خان ڪجهه ناهي چيو: شهريار آفريدي
پشاور (م ڊ) پاڪستان تحريڪ انصاف جي اڳواڻ ۽ اڳوڻي مملڪتي وزير شهريار آفريدي دعويٰ ڪئي آهي ته پارٽي سربراهه عمران خان شير افضل مروت بابت ڪجهه ناهي چيو. بئريسٽر گوهر علي کي به خبر ناهي ته انهن کي ڪيئن هٽايو وڃي. عمران خان سان چيڪ ڪنداسين پوءِ خبر پوندي. پشاور هاءِ ڪورٽ ۾ ميڊيا سان ڳالهائيندي هن چيو ته ڪالهه بئريسٽر گوهر کان شير افضل مروت بابت پڇيو ويو، کيس به ڪا خبر ناهي. شير افضل مروت جون پارٽيءَ لاءِ خدمتون آهن ۽ هو جتي به ويندو هو اتي ويندو هو. شرافضل مروت مشڪل وقت ۾ مضبوط بيٺو آهي.
پارٽي مان ڪڍڻ جو فيصلو عمران خان جو پنهنجو ناهي: شير افضل مروت
اسلام آباد(م ڊ) قومي اسيمبلي جي ميمبر شير افضل مروت جو چوڻ آهي ته مون کي پارٽي مان ڪڍڻ جو فيصلو پي ٽي آءِ باني جو پنهنجو فيصلو ناهي، مون کي مفاد پرست ٽولي پارٽي مان ڪڍرايو آهي، ان گروپ گذريل هڪ سال کان عمران خان کي وڪڙ ۾ آڻي رکيو آهي، بار بار پارٽي مان ڪڍي منهنجي بي عزتي ڪئي پئي وڃي، وڌيڪ برداشت نه ٿو ڪري سگهان، هاڻي عمران خان سان ملاقات ڪرڻ نه ٿو چاهيان، مون کي پارٽي مان ڪڍڻ سراسر ناانصافي آهي، منهنجو موقف ٻڌڻ کانسواءِ مون کي پارٽي مان ڪڍڻ افسوسناڪ آهي.
