اسٽرابيري هڪ اهڙو ميوو آهي جيڪو نه رڳو ڏسڻ ۾ وڻندڙ هوندو آهي پر ان جو ذائقو پڻ شاندار آهي. ٿوري مقدار ۾ اسٽرابيري کائڻ سان پروٽين، ڪاربوهاڊريٽس، غذائي فائبر، ڪيلشيم، آئرن، ميگنيشيم، فاسفورس، پوٽاشيم، وٽامن سي، فوليٽ ۽ وٽامن اي جهڙا اهم غذائي جزا حاصل ٿين ٿا.
اهو ميوو نباتاتي ڪيميائي مرڪبن سان ڀرپور آهي، جيڪي صحت لاءِ فائدي مند ثابت ٿين ٿا ۽ مختلف بيمارين جو خطرو گهٽ ڪن ٿا. اسٽرابيري جا ڪجهه اهم فائدا هيٺ ڏجن ٿا.
دل جي بيمارين کان بچاءُ:
اسٽرابيري ۾ موجود اينٽي آڪسائيڊنٽس دل جي بيمارين کان بچاءُ ۾ مددگار ثابت ٿي سگهن ٿا. هڪ تحقيق مان خبر پئي آهي ته ان ۾ موجود اينٽي آڪسائيڊنٽس دل جي حملن جو خطرو گهٽ ڪن ٿا.
فالج جو خطرو گهٽ ڪرڻ:
اسٽرابيري ۾ موجود فليونوئڊز فالج جو خطرو گهٽائڻ ۾ مددگار ٿي سگهن ٿا. هڪ تحقيق مان اها به خبر پئي آهي.
ڪينسر کان بچاءُ:
اسٽرابيري ۽ اهڙن ٻين بيريز ۾ موجود غذائي مرڪب ڪينسر جي ڪجهه قسمن کان بچاءُ ۾ مدد فراهم ڪري سگهن ٿا. ان بابت وڌيڪ تحقيق انسانن تي ٿيڻ ضروري آهي.
بلڊ پريشر تي ضابطو:
اسٽرابيري ۾ موجود پوٽاشيم هاءِ بلڊ پريشر کي گهٽ ڪرڻ ۾ مدد ڏيندو آهي، جيڪو دل جي صحت لاءِ فائديمند آهي.
قبض کان بچاءُ:
فائبر سان ڀرپور هجڻ سبب اسٽرابيري قبض جهڙي عام مسئلي کان بچائڻ ۾ مددگار آهي.
شگر کان بچاءُ:
اسٽرابيري ۾ موجود پولي فينولز انسولين جي حساسيت کي بهتر بڻائين ٿا، جنهن سان بلڊ شوگر جي سطح ۾ اضافو ٿيڻ جو خطرو گهٽ ٿئي ٿو.
جوڙن جي تڪليف ۾ آرام:
اسٽرابيري جي ورم ڪش خصوصيتن سبب جوڙن جي تڪليف ۾ گهٽتائي ٿي سگھي ٿي ۽ گوڏن ۾ سوڄ پڻ گهٽ ٿيندي آهي.
چمڙي جي حفاظت:
اسٽرابيري ۾ موجود وٽامن سي چمڙي جي لچڪ ۽ نمي کي بهتر بڻائڻ ۾ مددگار آهي ۽ اها چمڙي کي نقصان کان بچائيندي آهي.
دماغي صحت بهتر بڻائي:
تحقيقي رپورٽن موجب، اسٽرابيري جهڙا اينٽي آڪسائيڊنٽس سان ڀرپور ميوا دماغي صحت کي بهتر بنائڻ ۾ مددگار آهن، ۽ عمر سان گڏ دماغي زوال جي رفتار سست ٿي وڃي ٿي.
