سنڌ ۾ ڪامورا ڪميشن جي چڪر ۾، ترقياتي ڪم سست رفتاري جو شڪار!

ڪراچي(رپورٽ: خدا ڏنو شاھ) سنڌ سرڪار جي خاموشي ڪميشن جي معاملن ۽ بيورو ڪريسي جي نا اهلي سبب پرڳڻي ۾ جاري ترقياتي رٿائون سخت متاثر، رکيل رقم جو فقط 26 سيڪڙو خرچ ٿي سگهيو، جڏهن ته جاري ڪيل رقم مان ٻن ٽماهين ۾ فقط 13 ارب 6 ڪروڙ خرچ ٿي سگهيا آهن، عوامي آواز کي مليل دستاويزن موجب سنڌ ۾ جاري ترقياتي رٿائن تي ڪم سست رفتاري جي شڪار آهي، صوبائي حڪومت ۽ بيوروڪريسي ۾ ڪميشن جي چڪر توڙي انتظامي نااهلي صوبي جي جاري ترقياتي رٿائن کي رولي ڇڏيو آهي، ناڻي کاتي سنڌ زراعت کاتي کي 11 ڪروڙ 60 رپيا جاري ڪيا جنهن مان کاتي فقط 2 ڪروڙ 71 لک خرچ ڪيا جيڪو رکيل رقم جو 6 سيڪڙو ٿئي ٿو، اوقاف ۽ زڪوات واري کاتي کي 7 ڪروڙ 44 لک جاري ٿيا جنهن مان 2 ڪروڙ 79 لک خرچ ڪيا ويا آهن، تعليم کاتي کي 1 ارب 95 ڪروڙ جاري ٿيا جنهن مان کاتي 1 ارب 12 ڪروڙ خرچ ڪري ڏيکاريا آهن جيڪا رقم جاري ڪيل رقم جو 58 سيڪڙو آهي، بورڊ آف روينيو کي 53 لک جاري ٿيا جنهن مان کاتي فقط 7 لک خرچ ڪيا آهن، ثقافت کاتي کي 23 ڪروڙ 60 لک جاري ٿيا جنهن مان کاتي تيزي سان 16 ڪروڙ 74 لک خرچ ڪري ڏيکاريا آهن، خرچ ڪيل رقم جاري رقم جو 71 سيڪڙو آهي، توانائي واري کاتي کي 18 ڪروڙ 86 لک جاري ٿيا جنهن مان 11 ڪروڙ 92 لک خرچ ڪيا ويا، ماحوليات واري کاتي کي 1 ڪروڙ 68 لک جاري ٿيا جنهن مان فقط 60 لک خرچ ڪيا ويا آهن، ناڻي کاتي کي 5 ڪروڙ 15 لک جاري ٿيا جنهن مان 22 لک خرچ ٿي سگهيا جيڪا رقم رکيل رقم جو فقط 1 سيڪڙو آهي، جهنگلي جيوت ۽ ٻيلي کاتي کي 3 ڪروڙ 58 لک جاري ٿيا جنهن مان 3 ڪروڙ 6 لک خرچ ڪيا ويا،گورنر هائوس سيڪريٽريٽ کي 75 لک جاري ڪيا ويا جنهن مان 58 لک خرچ ڪيا ويا، صحت کاتي کي 44 ڪروڙ 12 لک جاري ڪيا ويا جنهن مان 9 ڪروڙ 95 لک خرچ ٿي سگهيا،گهرو کاتي کي 43 ڪروڙ 59 لک جاري ڪيا ويا جنهن مان 27 ڪروڙ 14 لک خرچ ٿي سگهيا، هيومن سيٽلمينٽ واري کاتي کي 50 لک جاري ٿيا جنهن مان 20 لک خرچ ٿي سگهيا، انڊسٽريز واري کاتي کي 3 ڪروڙ 85 لک جاري ٿيا جنهن مان 1 ڪروڙ 81 لک خرچ ٿي سگهيا،آءِ ٽي کي 72 لک جاري ٿيا جنهن مان 5 لک خرچ ڪيا ويا، انويسٽمينٽ واري کاتي کي 16 ڪروڙ 71 لک جاري ڪيا ويا جنهن مان فقط 75 لک خرچ ٿي سگهيا، آبپاشي کاتي کي 2 ارب 49 ڪروڙ جاري ٿيا جنهن مان 1 ارب 70 ڪروڙ خرچ ڪيا ويا، ليبر کاتي کي 1 ڪروڙ 32 لک جاري ٿيا جنهن مان 48 لک خرچ ڪيا ويا، قانون واري کاتي کي 19 ڪروڙ 96 لک جاري ٿيا جنهن مان 14 ڪروڙ 61 لک خرچ ڪيا ويا، لائيو اسٽاڪ کاتي کي 9 ڪروڙ 73 لک جاري ڪيا ويا جنهن مان کاتي 4 ڪروڙ 88 لکن کي رڳڙو ڏنو، مڪاني ادارن واري کاتي کي 4 ارب 19 ڪروڙ جاري ڪيا ويا جنهن مان کاتي بنا ڪنهن ڪم جي 2 ارب 26 ڪروڙ 79 لکن جي رقم جو  ٽُڪو لڳايو، ميچنگ ايلوڪيشن جي نالي تي تي 39 ڪروڙ 51 لک جاري ٿيا جنهن مان 19 ڪروڙ 50 لکن جي رقم خرچ ڪئي ويئي، ميگا پراجيڪٽ جي نالي تي 13 ڪروڙ جاري ڪري 12 ڪروڙ 20 لکن جي رقم خرچ ڪئي ويئي،نيو ڊولپمينٽس انيشيٽوز جي نالي تي 18 ڪروڙ 9 لک جاري ڪيا ويا جنهن مان 8 ڪروڙ 44 لک خرچ ٿيا، پلاننگ ۽ ڊولپمينٽ کاتي کي 39 ڪروڙ 79 لک جاري ٿيا جنهن مان 23 ڪروڙ 78 لک خرچ ڪيا ويا، پاپوليشن ويلفيئر کاتي کي 1 ڪروڙ 21 جاري ٿيا جنهن مان 63 لک خرچ ڪيا ويا، صوبائي اسيمبلي کي 2 ڪروڙ 95 لک جاري ٿيا جنهن مان 1 ڪروڙ 42 لک خرچ ٿي ويا، صوبائي محتسب کي 63 لک جاري ٿيا جنهن مان 16 لک خرچ ڪيا ويا، پبلڪ هيلٿ انجينئرنگ کاتي کي 1 ارب 55 ڪروڙ 36 لک جاري ٿيا جنهن مان کاتي 83 ڪروڙ خرچ ڪري ڇڏيا آهن، بحالي واري کاتي پي ڊي ايم اي کي 3 ڪروڙ 31 لک جاري ٿيا جنهن مان 2 ڪروڙ 54 لک خرچ ڪيا ويا آهن، ايس جي اي اينڊ سي نالي کاتي کي 2 ارب 50 ڪروڙ 48 لک جاري ڪيا ويا جنهن مان 1 ارب 84 ڪروڙ خرچ ڪيا ويا، سنڌ پبلڪ سروس ڪميشن کي 10 ڪروڙ جاري ٿيا جنهن مان 7 ڪروڙ 24 لک خرچ ڪيا ويا، سوشل ويلفيئر کي 1 ڪروڙ 30 لک جاري ڪيا ويا جنهن مان کاتي 59 لک خرچ ڪيا، اسپورٽس ۽ يوٿ افيئرز کي 44 ڪروڙ جاري ٿيا جنهن مان 21 ڪروڙ 37 لک خرچ ڪيا ويا، ٽرانسپورٽ کاتي کي 16 ڪروڙ 16 لک جاري ٿيا جنهن مان 7 ڪروڙ خرچ ڪيا ويا، ورڪس ۽ سروس واري کاتي کي 4 ارب 67 ڪروڙ جاري ٿيا جنهن مان 3 ارب 24 ڪروڙ 80 لک خرچ ڪيا ويا آهن، مجموعي طور تي سمورن کاتن کي 21 ارب 44 ڪروڙ 79 جاري ٿيا جن مان سڀني کاتن 13 ارب 6 ڪروڙ 4 لک خرچ ڪيا آهن،سرڪاري ذريعن دعويٰ ڪئي آهي ته بيورو ڪريسي ۽ ٺيڪيدارن ۽ کاتن جي وزيرن وچ ۾ ڪميشن جي معاملن انتظامي نا اهلي توڙي بيوروڪريسي جي سستي سبب صوبي جون ترقياتي رٿائون سخت متاثر ٿيون آهن.

• ٿرڪول سميت 15 کاتا بي پرواهه،  هڪ رپيو به خرچ نه ڪيو!

ڪراچي: سنڌ ۾ جاري ترقياتي اسڪيمن تي صوبي جي 15 کاتن هڪ رپيو خرچ نه ڪيو،ناڻي کاتي ٻن ٽماهين لاءِ 15 کاتن کي رقم  جاري ڪئي پر ڪنهن به کاتي ٽڪو ئي خرچ نه ڪيو ، هڪ رپيو به خرچ نه ڪندڙ کاتن ۾ پوئتي پيل علائقن جي ترقي وارو کاتو،سوشل پروٽيڪشن، سنڌ روينيو بورڊ، ٻوڏ متاثر انفرا اسٽرڪچر، مائينز ۽ منرل، لائيننگ آف مين ڪئنالز، ڪو آپريٽو، ايڪسائيز اينڊ ٽيڪسيشن، خوراڪ کاتو، هيومن رائيٽس، ، ٿرڪول، ٽريننگ مينيجمينٽ، وومين ڊولپمينٽ، ايلوڪيشن فار ڪاسٽ امپيڪٽ سميت ٻيا کاتا شامل آهن، جن ترقياتي بجيٽ استعمال ئي نه ڪئي آهي.