ڪراچي (رپورٽر) دهشتگردي ٽوڙ عدالت بحريا ٽائون حملي ڪيس ۾ محفوظ ڪيل فيصلو ٻڌائي ڇڏيو، جنهن ۾ عدالت ڏوھ ثابت نه ٿيڻ تي جسقم اڳواڻ صنعان قريشي ۽ ٻين جوابدارن کي بري ڪرڻ جو حڪم ڏئي ڇڏيو. عدالت اهو فيصلو وڪيلن ۽ شاهدن جي شاهدي ٻڌڻ کانپوءِ، ڪيس جي ساڍا ٽي سال ڊگهي ٻڌڻي کان پوءِ ڏنو. جوابدارن تي بحريا ٽائون تي حملو ڪرڻ، باهيون ڏيڻ، ڀڃ ڊاهه سميت ٻين الزامن تحت ڪيس داخل هئا. ان کان اڳ، بحريا ٽائون ڪيس ۾ ايس ٽي پي سربراهه ڊاڪٽر قادر مگسي ۽ ايس يو پي سربراهه سيد جلال محمود شاهه سميت ٻين قومي اڳواڻن خلاف ڪيس داخل ڪيا ويا هئا، جن کي عدالت اڳ ئي آزاد ڪري چڪي آهي. ڪيس جي ٻڌڻي کانپوءِ وڪيل اڳواڻن محمد خان شيخ، محمد جمن پنهور، ڪاظم مهيسر ۽ ٻين عدالت جي فيصلي کي "سنڌ جي عوام جي فتح” قرار ڏنو. هنن چيو ته هاڻي سنڌوءَ تي ڪئنالن بابت جهدوجهد ڪئي ويندي.
