اسلام آباد(م ڊ) جڊيشل ڪميشن آف پاڪستان سنڌ هاءِ ڪورٽ ۾ ايڊيشنل ججن لاءِ 12 نالن جي منظوري ڏئي ڇڏي، ڪالهه سپريم جڊيشل ڪميشن جي چيئرمين جسٽس يحيٰ آفريدي جي صدارت هيٺ اجلاس ٿيو، جنهن ۾ سنڌ هاءِ ڪورٽ ۾ 12 ايڊيشنل ججن جي مقرري لاءِ 46 نالن تي غور ڪيو ويو، جڊيشل ڪميشن کي موڪليل نالن ۾ 6 ڊسٽرڪٽ اينڊ سيشن ججن جا نالا ۽ 40 وڪيل هئا، جڊيشل ڪميشن جي اجلاس ۾ سنڌ هاءِ ڪورٽ ۾ ايڊيشنل ججن لاءِ 12 نالن جي منظوري ڏني وئي، ذريعن موجب اجلاس ۾ تسنيم سلطانه ۽ محسن شاهواڻي کي سنڌ هاءِ ڪورٽ ۾ ايڊيشنل جج بڻائڻ جي منظوري ڏني وئي، ان کان سواءِ عثمان علي هادي ۽ نثار ڀنڀرو کي به سنڌ هاءِ ڪورٽ ۾ ايڊيشنل جج بڻائڻ جي منظوري ڏني وئي، اهڙي طرح ميران محمد شاهه، علي حيدر ادا، رياضت علي، فياض الحسن شاهه کي به سنڌ هاءِ ڪورٽ ۾ ايڊيشنل جج بڻائڻ جي منظوري ڏني وئي، چيف جسٽس جڊيشل ڪميشن، سپريم جوڊيشل، لا اينڊ جسٽس ڪميشن ۾ مقررين لاءِ ڪميٽيون قائم ڪري ڇڏيون آهن، پڌرائي ۾ چيو ويو آهي ته قانون ۽ انصاف واري ڪميشن جي سيڪريٽري جي مقرري لاءِ ڪميٽي جي سربراهي چيف جسٽس ڪندو، ڪميٽي ۾ جسٽس عائشا ملڪ ۽ جسٽس شاهد وحيد شامل هوندا، جڊيشل ڪميشن جي سيڪريٽري جي مقرري لاءِ 5 رڪني ڪميٽي قائم ڪئي وئي آهي، ڪميٽي ۾ جسٽس منصور علي شاهه، جسٽس منيب اختر ۽ جسٽس امين الدين خان شامل آهن، جسٽس جمال مندوخيل ۽ اٽارني جنرل به ڪميٽي جو حصو هوندا.
