سکر (رپورٽ:آزاد مهر) گهوٽڪي ۽ ڪشمور ۾ هلندڙ ڪارنهن جي معاملي تان تڪرار شروع ٿيو ٺاھ ٿيڻ جي باوجود ٻيهر ساوند برادري جي هٿان سندراڻي قتل ٿيل سراج سندراڻي جي قتل ۽ سندراڻي برادري جي هٿياربندن جي هٿان ساوند برادري جا ڇھ ماڻهو زخمي ٿي پيا هئا جنهن جو فيصلو سندراڻي هائوس دڙي ۾ ٿي گذريو، ٻه ڪروڙ چاليھ لک روپيا ساوند ڌر تي ڏنڊ ساوند برادري جا ڇھ ماڻهو زخمي ٿيڻ جا 86 لک روپيا ڏنڊ جي سزا، ٽوٽل 3 ڪروڙ 26 لک روپيا ٻئي ڌريون کير کنڊ ٿي ويون، خبر موجب غوثپور لڳ ڳوٺ دڙي سندراڻي ۾ ساوند ۽ سندراڻي تڪرار جو نبيرو پي پي ايم پي اي سردار عابد سندراڻي جي سرپئنچي هيٺ ٿي گذريو۔ٻنھي ڌرين جي معززين سميت نبيري ۾ وڏي انگ ۾ ماڻهن پاران جرڳي ۾ شرڪت ڪئي وئي، ساوند سندراڻي تڪرار ۾ مارجي ويل سندراڻي برادري جي سراج سندراڻي سميت ساوند برادري جي زخمي ٿيلن ڇھن ڄڻن ھر ھڪ فياض احمد، عبدالقادر، عبدالھادي، عبدالغفار، مورخان ۽ طفيل احمد ساوند شامل آھن، انھن ڇھن ڄڻن کي ٽي ھفتا اڳ قادرپور شھر جي ڳوٺ رئيس يار محمد ۾ پلاند ۾ گوليون ھڻي زخمي ڪيو ويو ھيو، جنھن جو اڄ دڙي ڳوٺ جي سندراڻي ھائوس تي نبيرو ڪيو ويو، ساوند سندراڻي تڪرار جي خاتمي لاءِ ٿيندڙ نبيري ۾ ٻنھي ڌرين جا ڪيترائي معزز اڳواڻ ۽ برادري جا چڱا مڙس ڊاڪٽر طارق ساوند، رئيس صبحان، رئيس حبيب الله، ملان جلال، رئيس ھاشم ۽ جلال بگٽي سميت ٻيا شامل هئا، مير عابد سندراڻي ٻنھي ڌرين جون ڳالھيون ٻڌڻ بعد فيصلي جي فتوا جاري ڪندي چيو ويو ته ڪجھه مھينا اڳ ٿيل گوھر پئلس تي ٻنھي ڌرين جي نبيري بعد ساوند ڌر طرفان اڳرائي/ڀڃڪڙي ڪرڻ تي مٿن ٻه ڪروڙ جو ڏنڊ ۽ مقتول سراج سندراڻي جي خون جو عيوضو 20 لک ۽ سندس گھر ۾ ڀڃ ڊاھ ڪرڻ جو عيوضو به 20 لک ساوند ڌر تي وڌو ويو، جڏھن ته سندراڻي برادري جي ھٿياربندن طرفان پلاند ۾ زخمي ڪيل ساوند برادري جي ڇھن ڄڻن جو عيوضو/ڏنڊ ڇھاسي لک روپيه وڌو ويو، مجموعي طور تي ٻنهي ڌرين مٿان ٽي ڪروڙ ۽ ڇويهه لک ڏنڊ وجھي ڌرين کي کير کنڊ ڪيو ويو، ٺاهه بعد علائقي ۾ خوشي جي لهر ڇانيل وئي.
