ماهرن جو چوڻ آهي ته سنڌ ۾ غذائي صورتحال ڪافي ڳڻتي جوڳي بڻيل آهي، خاص طور 2022ع جي ٻوڏ کان پوءِ قدرتي آفتن نه صرف بنيادي ڍانچي کي متاثر ڪيو آهي بلڪه عورتن ۽ ٻارڙن جي صحت تي به منفي اثر ظاهر ٿي رهيا آهن. ٻوڏ کان پوءِ ڳورهاري عورتن جي صورتحال اڃا به وڌيڪ خراب رهي آهي. هڪ اندازي موجب 2.5 ملين عورتون متاثر ٿيون آهن. جن ۾ ڪتيريون اهڙيون آهن جنن کي طبي سهولتون به ملي نه سگهيون آهن. ڪتيريون عورتون کاڌي جي کوٽ جون شڪار رهيون آهن، جڏهن ته سنڌ ۾ غذائيت جي کوٽ جي حوالي سان انگ اکر حوصلي افزا ناهن. ان ڏس ۾ حڪومت ۽ مختلف غير سرڪاري تنظيم گڏجي ڪري ڪم ڪري رهيون آهن. اهو ڪم رڳو ٻوڏ متاثر عورتن لاءِ نه پر سڄي سنڌ جي عورتن لاءِ جيڪا متوازن غذاءُ کي استعمال نٿيون ڪري سگهن انهن جي لاءِ ڪم ڪيو پيو وڃي. غذاءُ جي کوٽ جي ڪري عورتون ڪمزور ٿي وينديون آهن ۽ انهن ۾ مختلف بيماريون پکڙجي وينديون آهي جنهن ڪري پيدا ٿيندڙ ٻار به مختلف بيمارين جو شڪار ٿي ويندا آهن.
ان حوالي سان سِيو دي چلڊرن انٽرنشينل جي نيشنل نيوٽريشن ڪوآرڊينيٽر شيزه حميد جو چوڻ آهي ته سنڌ ۾ کير پيئارڻ واري ماءُ ۾ بهترين خوراڪ ۽ ٻار جي پيدائش جي وقت جيڪا آگاهي هوندي آهي ان بابت ميڊيا بهتر طور تي ڄاڻ ڏئي سگهي ٿو. هن چيو ته سنڌ ۾ اهڙي اهم معاملن تي آگاهي ڏيڻ لاءِ اسان ميڊيا سان گڏجي ڪم ڪنداسين. شيزا حميد چيو ته سنڌ ۾ غذائي کوٽ بابت جيڪي انگ اکر موجود آهن اهي حوصلي افزا ناهن. ماءُ جي کير پيارڻ ۾ واڌاري، خاندان دوست پاليسين ۽ عالمي اصولن تي عمل ڪرڻ جي ضرورت آهي. هن انهن مسئلن جي حل لاءِ سمورن اسٽيڪ هولڊرز کي فوري ۽ گڏيل ڪوششن جي ضرورت تي زور ڏنو. هن چيو ته انهن چئلينجن تي فوري ڌيان ڏيڻ ۽ انهن کي منهن ڏيڻ لاءِ حڪمت عملي تجويز ڪرڻ لاءِ پنهنجو ڪردار ادا ڪرڻو پوندو.
سِيو دي چلڊرن جي نيشنل پروجيڪٽ مئنيجر محمد اعظم ڪياني جو چوڻ آهي ته زچگي، ٻار ۽ ماءُ جي غذائيت کي فروغ ڏيڻ ۾ ميڊيا جي ماهرن کي شامل ڪرڻ ضروري آهي. هن چيو ته ميڊيا پليٽ فارم ڪميونٽي کي مناسب غذائيت جي اهميت بابت آگاهي ڏيڻ ۾ اهم ڪردار ادا ڪن ٿا. ميڊيا عورتن کي آگاهي فراهم ڪرڻ ۾ اهم ڪردار ادا ڪري سگهي ٿي ته جيئن متوازن غذا ۽ زچگي جي صحت، خاص ڪري کير پيارڻ واري مائرن جي طريقي ڪار کي فروغ ڏيڻ لاءِ صحافين ۽ ميڊيا جا ماهر مؤثر طريقي سان مسئلن تي رپورٽ ڪن، عوامي راءِ تي اثرانداز ٿيڻ ۽ پاليسي سازن کي جوابدي رکڻ جي لاءِ آگاهي ڏين. هن چيو ته اسان سڄي ملڪ ۾ غذائيت جي نتيجن کي بهتر بڻائڻ ۾ عوامي ۽ خانگي توڙي ڪميونٽي ذريعي هلندڙ قدمن جي اثر کي پڻ اجاگر ڪيو آهي.
ايل ايچ ڊبليو جي پروگرام ڊائريڪٽر ڊاڪٽر فرحانه ميمڻ سنڌ ۾ غذائي کوٽ جي چيلنجن، خاص ڪري انهن مسئلن کي منهن ڏيڻ ۾ ميڊيا جي ڪردار بابت چيو ته عوام کي صحيح معلومات ڏني وڃي. هن چيو ته صحت جي شعبي جي انگ اکرن کي وڌيڪ بهتر بڻائڻ جي ضرورت آهي. مائرن ۽ ٻارن لاءِ بهتر صحت جا نتيجا حاصل ڪرڻ لاءِ غذائيت ۽ کير پيارڻ اهم آهن. هن چيو ته اسان پبلڪ هيلٿ ڊپارٽمينٽ، يونيسيف ۽ سِيو دي چلڊرن سان گڏجي ڪم ڪري رهيا آهيون، ته جيئن اسان وٽ موجوده صحت جي چئلينجن کي منهن ڏيڻ لاءِ انهن علائقن کي بهتر بڻائي سگهجي. ماهرن ميڊيا جي نمائندن کي گذارش ڪئي ته بهتر صحت، خاص طور تي ماءُ ۽ ٻار جي غذائيت جي حوالي سان مثبت خبرن جي واڌاري ۾ مثبت ڪردار ادا ٿي سگهي. هنن چيو بهتر ڪم به ٿي رهيا آهن، اسان کي سماج ۾ گڏجي ڪم ڪرڻ جي ضرورت آهي ته جئين اسان سنڌ ۾ غذا جي صورتحال بهتر بڻائي سگهون.
ماهرن جو چوڻ آهي ته سنڌ ۾ غذائي صورتحال ڪافي ڳڻتي جوڳي بڻيل آهي، خاص طور 2022ع جي ٻوڏ کان پوءِ قدرتي آفتن نه صرف بنيادي ڍانچي کي متاثر ڪيو آهي بلڪه عورتن ۽ ٻارڙن جي صحت تي به منفي اثر ظاهر ٿي رهيا آهن. ٻوڏ کان پوءِ ڳورهاري عورتن جي صورتحال اڃا به وڌيڪ خراب رهي آهي. هڪ اندازي موجب 2.5 ملين عورتون متاثر ٿيون آهن. جن ۾ ڪتيريون اهڙيون آهن جنن کي طبي سهولتون به ملي نه سگهيون آهن.
