لاهور (ويب ڊيسڪ) چيمپيئنز ٽرافي جي ميچن مان پي سي بي کي وڏي آمدني جي اميد آهي، ٽڪيٽن جي وڪرو مان حاصل ٿيندڙ آمدني جو اڌ کان وڌيڪ حصو پاڪستان کي ملڻ وارو آهي، ۽ ان سلسلي ۾ جلد ئي لکت ۾ معاهدو ٿي ويندو.
چيمپيئنز ٽرافي 19 فيبروري کان 9 مارچ تائين پاڪستان ۾ ٿيندي.
پاڪستان جو دورو نه ڪندڙ ڀارتي ڪرڪيٽ ٽيم جا ميچ دبئي ۾ رٿيل آهن.
جيڪڏهن بلو شرٽس فائنل تائين پهتي ته 5، سيمي فائنل تائين محدود رهڻ تي 4 ۽ پهرئين رائونڊ مان ٻاهر ٿيڻ تي 3 ميچ يو اي اي ۾ کيڏيون وينديون.
انهن ميچن ۾ 23 فيبروري تي ٿيندڙ پاڪستان-ڀارت بلاڪ بسٽر ميچ به شامل آهي.
پي سي بي شروعاتي شيڊول ۾ ان ميچ جي ميزباني قذافي اسٽيڊيم لاهور کي ڏني هئي.
پي سي بي اختيارين کي اميد هئي ته اسٽيڊيم تماشائين سان ڀرجي ويندو، پر ڀارتي بورڊ حڪومت کان اجازت نه ملڻ جو جواز ڏئي سموري رٿابندي متاثر ڪئي، ان باوجود، يو اي اي ۾ ٿيندڙ ميچن مان پاڪستان کي وڏي آمدني ملندي.
پي سي بي جي هڪ سينئر آفيسر ٻڌايو ته ٽڪيٽن جي وڪرو مان حاصل ٿيندڙ آمدني جو اڌ کان وڌيڪ حصو پاڪستان کي ملندو ۽ جلد ئي امارات ڪرڪيٽ بورڊ سان تحريري معاهدو ٿي ويندو.
دبئي ڪرڪيٽ اسٽيڊيم ۾ 25 هزار کان وڌيڪ تماشائين جي گنجائش آهي ۽ ماضي ۾ پاڪستان-ڀارت ميچن دوران اسٽيڊيم ۾ پير رکن جي جاءِ نه هوندي هئي.
هن ڀيري به اهوئي امڪان آهي، يو اي اي ۾ رهندڙ پاڪستاني ۽ ڀارتي شهرين سان گڏ ٻين ملڪن مان به وڏي انگ ۾ شوقين دبئي ايندا.
ڀارتي ٽيم جي ٻين ميچن ۾ به مداحن جو وڏو انگ ميچ ڏسڻ لاءِ اسٽيڊيم جو رخ ڪندو.
ذريعن موجب، آءِ سي سي جلد ٽڪيٽن جي قيمت ۽ وڪرو جو شيڊول جاري ڪندي.
جيڪڏهن ڀارتي ٽيم ناڪ آئوٽ ميچن تائين پهتي ته پاڪستان جي آمدني تي اثر پوندو، خاص طور تي فائنل جو لاهور ۾ نه ٿيڻ مداحن لاءِ مايوس ڪندڙ هوندو.
