حيدرآباد (پ ر ) سنڌ ترقي پسند پارٽي جي سينٽرل ڪميٽي جو اجلاس پارٽي چيئرمين ڊاڪٽر قادر مگسي جي صدارت ۾ ٿي گذريو، اجلاس ۾ ايس ٽي پي جي وائيس چيئرمين انجنيئر گلزار سومرو، حيدر شاھاڻي ، نثار ڪيريو ، هوت خان گاڏهي ،ڊاڪٽر عبدالحميد ميمڻ ،قادر چنا، ڊاڪٽر احمد نوناري ،امتياز سمون ،ڊاڪٽر سومار مڱريو ، حيدر ملاح ،عاشق سولنگي، گوتم چنا، ڊاڪٽر مظھر ميمڻ، خدابخش درس، ڄام شوڪت ابڙو ، ، خير محمد مگسي ۽ ٻين شرڪت ڪئي. اجلاس ۾ سنڌو درياءِ تي ڪئنال ٺاهڻ واري منصوبي خلاف ھلندڙ احتجاجي تحريڪ جو جائزو ورتو ويو ۽ اطمينان جو اظهار ڪيو ويو. 18 ڊسمبر تي هڙتال جي سڏ تي ڏنل سنڌ جي موٽ تي عوام جا ٿورا مڃيا ويا ۽ ان کي سنڌو درياءِ تي ڪئنال ٺاهڻ واري منصوبي خلاف عوامي ريفرينڊم قرار ڏنو ويو. اجلاس ۾ فيصلو ڪيو ويو ته ايس ٽي پي چيئرمين ڊاڪٽر قادر مگسي جي اڳواڻي ۾ سنڌو درياءِ کي بچائڻ جي لاءِ جاڳرتا مهم جي هلائي ويندي جنهن سلسلي ۾ 7 جنوري کان 12 فيبروري تائين سڄي سنڌ جي مختلف شهرن ۾ جلسا ڪيا ويندا. هن چيو ته سنڌو درياهه نه صرف هڪ عظيم تاريخ، تهذيب، تمدن ۽ ثقافتي تاريخ رکندڙ آهي پر هي سنڌ کي سرسبز شاداب ۽ ڪروڙين انسانن جي جياپي جو واحد ذريعو آهي ان کي سُڪائڻ جي سازش سان سنڌ جا ڇهه ڪروڙ انسان متاثر ٿيندا ۽ سڄي سنڌ ريگستان جو ڏيک ڏيندي. عالمي انساني حقن جي تنظيمن کي به هن مسئلي تي آواز اٿارڻ گهرجي، هن چيو ته جيستائين هن ملڪ ۾ ننڍن صوبن سان ماٽيلي ماءُ جهڙو سلوڪ بند نه ڪيو ويو ۽ برابري جي بنياد تي حق نه ڏنا ويندا تيستائين ملڪ عدم استحڪام جو شڪار رهندو. انڪري هاڻي حڪمرانن کي هوش سنڀالڻ گهرجي ملڪ هاڻي وڌيڪ تجربن جي سگھه نٿو رکي.
