ابوظهبي (ويب ڊيسڪ) ڀارتي ماڊل ۽ اداڪارا اُروَشي روٽيلا پنهنجي پسنديدا پاڪستاني ڪرڪيٽر جو نالو ٻڌائي ڇڏيو.
بالي ووڊ جي ڪيئي فلمن ۾ اداڪاري جا جوهر ڏيکاريندڙ اداڪارا اروشي تڪرارن سبب هميشه خبرن ۾ رهندي آهي.
ڪڏهن هوءَ سيٽ تي زخمي ٿي پوندي آهي ته ڪڏهن سندس اڻوڻندڙ وڊيوز ليڪ ٿي وينديون آهن، هوءَ اداڪاري ڪري يا نه ڪري ميڊيائي سرخين تي سندس نالو ضرور نظر ايندو آهي.
گڏيل عرب رياستن ۾ بالي ووڊ جي فلمي ايوارڊ آئيفا جي هڪ تقريب دوران اروشي پنهنجي پسنديدا پاڪستاني ڪرڪيٽر جو نالو ٻڌايو.
تقريب دوران هڪ پاڪستاني صحافي اروشي کان پڇيو ته پاڪستان ڪرڪيٽ ٽيم مان اوهان جو فيورٽ ڪرڪيٽر ڪير آهي؟
جنهن جواب ۾ اروشي چيو ته پاڪستان هڪ بهترين ٽيم آهي، پر فاسٽ بالر نسيم شاهه انتهائي باصلاحيت ڪرڪيٽر آهي.
واضح رهي ته اروشي ماضيءَ ۾ به نسيم شاهه سبب سوشل ميڊيا تي ٽرينڊ ڪري چڪي آهي، 2023 ۾ اروشي روٽيلا ايشيا ڪپ ۾ پاڪ-ڀارت ميچ شروع ٿيڻ کان اڳ پاڪستاني فاسٽ بالر نسيم شاهه سان گڏ پاڪستان اسڪواڊ جي تصوير شيئر ڪئي هئي.
ان کانسواءِ ڀارتي اداڪارا قومي فاسٽ بالر کي سالگرهه ۽ اعزازي ڊي ايس پي بڻجڻ تي مبارڪباد پڻ ڏني هئي.
