اسلام آباد (بيورو رپورٽ) سينيٽ چيئرمين يوسف رضا گيلاني سينيٽر فيصل واوڊا خلاف اڻوڻندڙ لفظ استعمال ڪرڻ تي پاڪستان تحريڪ انصاف جي سينيٽر فلڪ ناز کي چترالي کي 2 ڏينهن لاءِ معطل ڪري ڇڏيو آهي. سينيٽ جي اجلاس کي خطاب ڪندي پي ٽي آءِ تي تنقيد ڪندي سينيٽر فيصل واوڊا چيو ته جيڪڏهن تقرير ۾ ماءُ، ڀيڻ، ڌيءَ جو خيال هجي ها ته ڪالهه جيڪو ٿيو اهو نه ٿئي ها. جيڪڏهن اسان جون مائرن اسان جي ڀينرن کي ڪجهه چوندا ته اسان خاموش نه رهنداسين. پي ٽي آءِ جي باني تي تنقيد ڪندي سينيٽر فيصل واوڊا چيو ته پي ٽي آءِ ڪالهه تائين نيب ترميمن جي خلاف هئي، اڄ انهن ئي ترميمن مان رليف ورتو. اڄ اهي چون ٿا ته هو فوج سان ڳالهائڻ لاءِ تيار آهن ۽ ڳالهائڻ لاءِ التجا ڪري رهيا آهن . ان دوران پي ٽي آءِ سينيٽر فلڪ ناز جي فيصل واوڊا سان تلخ کلامي ٿي، جنهن دوران فلڪ ناز اڻوڻندڙ لفظ استعمال ڪيا. سينيٽ چيئرمين يوسف رضا گيلاني سينيٽر فلڪ ناز جا نازڪ لفظ حذف ڪري ڇڏيا. ان حوالي سان سينيٽ ۾ فيصل واوڊا چيو ته ايوان ۾ سرعام گاريون پيون هلن. اسان جواب به نه ٿا ڏيون. سارجنٽ ايٽ آرمز کي گهرائي فلڪ ناز کي ٻاهر ڪڍو.فيصل واوڊا مطالبو ڪيو ته فلڪناز جي ميمبرشپ معطل ڪئي وڃي.
