ڪوئيٽا ( م ڊ ) بلوچستان جي ساحلي شهر گوادر ۽ راڄڌاني ڪوئيٽا سميت ٻين علائقن ۾ بلوچ يڪجهتي ڪميٽي پاران ڌرڻن ۽ احتجاجن جو سلسلو 6 هين ڏينهن به جاري آهي. ڪوئيٽا ۽ ايران جي سرحدي شهر تفتان وچ ۾ شاهراهه نوشڪي ۾ بلوچ يڪجهتي ڪميٽي جي ڪارڪنن تي فائرنگ جي نتيجي ۾ هڪ نوجوان جي قتل ۽ ٻن ڄڻن جي زخمي ٿيڻ خلاف ڌرڻو هنيو ويو. بلوچستان جي گهرو کاتي پاران ڳالهين جي ڪاميابي ۽ 80 جي لڳ ڀڳ گرفتار ماڻهن جي آزاديءَ جي دعوائن باوجود بلوچستان جي ساحلي شهر گوادر ۾ 28 جولاءِ کان جاري بلوچ يڪجهتي ڪميٽي جو ڌرڻو ختم نه ٿيو آهي. بلوچ يڪجهتي ڪميٽي پنهنجي بيان ۾ چيو آهي ته گوادر جي صورتحال ڳڻتي جوڳي آهي. رياستي ادارن ۽ گوادر انتظاميه پاران ڳالهين جي ڪوشش غير سنجيده آهي، جنهن جو مقصد احتجاج ڪندڙن کي منتشر ڪرڻ ۽ ظالمانه جبر کي تيز ڪرڻ آهي، جنهن سان وڌيڪ خونريزي ٿئي ٿي. هڪ طرف گوادر ۾ مظاهرين سان ڳالهين جي دعويٰ ڪئي پئي وڃي ته ٻئي طرف بلوچ يڪجهتي ڪميٽيءَ جي قيادت کي ڌمڪيون ڏنيون پيون وڃن ته هو پرامن احتجاج تان هٿ کڻي وڃن، ٻي صورت ۾ هو ڌرڻو ختم ڪري ڌرڻو هڻي ويهي رهندا. انتظاميا ۽ اختيارين بي واءِ سي اڳواڻن ۽ ٻين احتجاج ڪندڙن کي سڌي فائرنگ جي ڌمڪي ڏئي رهيا آهن. هنن چيو ته نوشڪي ۾ پرامن احتجاج ڪندڙن تي سڌي فائرنگ ڪري هڪ نوجوان کي قتل ڪيو ويو آهي ۽ ڪيترائي زخمي ٿي پيا. ڪراچي ۾ پرامن احتجاج ڪندڙن مٿان طاقت جو استعمال ڪيو ويو،احتجاج ڪندڙن کي روڊن رستن تي گھليو ويو ۽ تشدد ڪرڻ بعد گرفتار ڪيو ويو. اهڙا عمل حڪومت جي منافقانه نيت کي ظاهر ڪن ٿا.ڳالهين جو بهانو دير ڪرڻ واري حڪمت عملي آهي ڇو ته انتظاميه ۽ اختيارين سڌو سنئون بي واءِ سي جي اڳواڻن ۽ ٻين احتجاج ڪندڙن جي خلاف ظالمانه ڪارروايون جاري رکندا آهن. بلوچ يڪجهتي ڪميٽي جي ترجمان جو چوڻ هو ته اسان گذريل چئن ڏينهن کان رياست سان سمورين پارٽين جي ثالثي ذريعي ڳالهيون ڪري رهيا آهيون. ڳالهين دوران رياست کي بار بار ٻڌائي رهيا آهيون ته رياست ڳالهين لاءِ سازگار ماحول پيدا ڪري، سڄي بلوچستان ۾ پرامن مظاهرين تي طاقت ۽ تشدد جو استعمال بند ڪري. روڊ ۽ انٽرنيٽ کوليو، جنهن جي بندش سبب سڄي مڪران ۾ خوراڪ ۽ دوائن جي کوٽ پيدا ٿي وئي آهي. هن وڌيڪ چيو ته گذريل 8-9 ڏينهن کان ماڻهن جو گهرن ۾ ڪنهن به قسم جو رابطو ناهي. پر رياست اسان جا آئيني ۽ قانوني مطالبا مڃڻ بدران اسان کي ڳالهين جي نالي تي مسلسل تنگ ڪري رهي آهي ۽ ڌمڪيون ڏئي رهي آهي ته ڌرڻو ختم نه ٿيڻ جي صورت ۾ قتل عام ڪري ڌرڻي کي ختم ڪرايو ويندو، ترجمان موجب رياست پنهنجي هر قدم سان اهو ثابت ڪري رهي آهي ته بلوچستان ۾ ڪنهن به پرامن احتجاج کي برداشت نه ڪيو ويندو، احتجاج جو حق ته پاڪستان جو آئين به ڏئي رهيو آهي، پر رياست گوادر ۾ جاري ڌرڻي تي پنهنجي سڄي طاقت کي بلوچ قوم خلاف استعمال ڪري رهي آهي. هن چيو ته اسان گڏيل قومن کي اپيل ڪريون ٿا ته هن وقت بلوچستان جي خطرناڪ صورتحال جو ڀرپور نوٽيس ورتو وڃي. گوادر سميت مڪران ۾ لکين ماڻهن جون زندگيون خطري ۾ آهن. گڏيل قومن جو نوٽيس لکين زندگيون بچائي سگهي ٿو. هوڏانهن مستونگ شهر ۽ ڀرپاسي وارن علائقن ۾ گذريل هڪ هفتي کان موبائل فون ۽ انٽرنيٽ سروس بند آهي، جنهن سبب عوام کي سخت پريشانين کي منهن ڏيڻو پئجي رهيو آهي، انٽرنيٽ بند هجڻ سبب بئنڪن ادائيگين ۾ ڏکيائي پيش اچي رهي آهي. نوشڪي ۾ مڪمل شٽرڊائون هڙتال سبب دڪان بند رهيا، هوڏانهن وڏي وزير سرفراز بگٽي چيو آهي ته بلوچ يڪجهتي ڪميٽي جو گوادر ۾ ڌرڻو سازش آهي،انهن جو مقصد عالمي وفد جو دورو روڪڻ آهي،هدايت الرحمان بلوچ چيو ته مظاهرين لچڪ جو مظاهرو ڪن،گوادر ۾ صورتحال ڳنڀير آهي
