ڊبلن (ويب ڊيسڪ ) آئرش ڪرڪيٽرن پاڪستان خلاف سيريز کان اڳ بورڊ ( ڪرڪيٽ آئرلينڊ ) طرفان نون سينٽرل ڪانٽريٽس جي آڇ رد ڪري ڇڏي.
پرڏيهي ميڊيا موجب، 2024ع جي سينٽرل ڪانٽريڪٽس جي آڇ ۾ آءِ سي سي فنڊنگ مارچ ۾ ڪليئر ٿيڻ سبب دير ٿي جنهنڪري آئرش ڪرڪيٽر گذريل سال واري سينٽرل ڪانٽريڪٽ تحت کيڏي رهيا هئا.
پاڪستان خلاف سيريز کان اڳ آئرش ڪرڪيٽ يونين ( ڪرڪيٽ آئرلينڊ ) نون سينٽرل ڪانٽريڪٽس جي آڇ ڪئي جيڪا رانديگرن رد ڪري ڇڏي .
ميڊيا رپورٽن موجب، ڪرڪيٽرن معاوضي ۾ واڌ ۽ بين مراعتن جا خواهشمند آهن ۽ آئرش ڪرڪيٽرز ايسوسيئيشن رانديگرن طرفان بورڊ سان ڳالهيون ڪري رهي آهي.
ڪرڪيٽ آئرلينڊ جا خرچ وڌڻ ۽ فنڊنگ ۾ دير ٿيڻ سبب معاملا رولڙي جو شڪار رهيا پر جيڪڏهن ڳالهيون ڪامياب ٿيون ته رانديگرن کي پهرين مارچ کان نوان سينٽرل ڪانٽريڪٽ ۾ ملندا.
ياد رهي ته آئرلينڊ سڀاڻي پاڪستان خلاف ڊبلن ۾ پهرين ٽي ٽوئنٽي ميچ کيڏندي، آئرش ٽيم پاڪستان خلاف سيريز کانپوءِ نيڌرلينڊز جو دورو ڪندي ۽ ٽه ملڪي سيريز کانپوءِ ٽي ٽوئنٽي ورلڊ ڪپ لاءِ آمريڪا رواني ٿيندي.
ميڊيا رپورٽن موجب، آئرلينڊ جي وومين ڪرڪيٽ ٽيم اڃا تائين سينٽرل ڪانٽريڪٽس جي حوالي سان ڪو جواب ناهي ڏنو.
