ڪراچي (رپورٽر) رٿابندي ۽ ترقيات بابت صوبائي وزير سيد ناصر حسين شاهه چيو آهي ته سکر-حيدرآباد موٽر وي کي جلد کان جلد مڪمل ڪيو وڃي ۽ ان منصوبي کي ٻين منصوبن سان گڏ ايس آءِ ايف سي پاران پڻ ترجيح ڏني وڃي. ناصر شاهه چيو ته وفاقي حڪومت موٽر وي کي مڪمل ڪرڻ لاءِ ترجيحي بنيادن تي قدم کڻي. سکر-حيدرآباد موٽر وي کي وفاقي بجيٽ ۾ اوليت ڏني وڃي يا ان کي سي پيڪ ذريعي مڪمل ڪيو وڃي. سنڌ صوبي جي ترقي ۽ ملڪي معيشت جي استحڪام ۽ اچ وڃ ۾ پڻ اهم ڪردار ادا ڪندو. ان منصوبي جي مڪمل ٿيڻ سان ملڪ ۽ سنڌ صوبي جي خوشحالي ۾ اضافو ٿيندو. منصوبابندي ۽ ترقي واري صوبائي وزير سيد ناصر حسين شاهه وڌيڪ چيو ته هي موٽر وي افغانستان ۽ چين جي ملڪن کي ٻين ملڪن سان گڏائي ٿو، ان سان گڏ گوادر بندرگاهن لاءِ واپاري راهداري جو ذريعو پڻ آهي. صوبائي وزير چيو ته هي انتهائي اهم منصوبو ملڪ جي ٽرانسپورٽ ۾ ريڙهه جي هڏي آهي.
