اسلام آباد(عوامي آواز نيوز) وفاقي وزير مصدق ملڪ چيو آهي ته هو فيض آباد ڌرڻي واري ڪميشن رپورٽ سان اتفاق نٿو ڪري. نجي ٽي ويپروگرام ”لائيو وٿ نديم ملڪ“ ۾ ڳالهائيندي مصدق ملڪ چيو ته جيڪڏهن احتجاج ڪرڻ وارن کي روڪيو وڃي ته به حڪومت جو ڏوهه ۽ نه روڪيو وڃي تڏهن به ڏوهه حڪومت جو. هن چيو سڀني کي خبر آهي ته فيض آباد ڌرڻي پويان ڪير هو، اڳوڻو وزيراعظم به ڪيترائي ڀيرا ان جو نالو عوامي جلسن ۾ کڻي چڪو آهي، رپورٽ کي پبلڪ ڪيو وڃي ته جيئن عوام کي خبر پئجي سگهي ته فيض آباد ڌرڻي ۾ ڇا ٿيو هو. مصدق ملڪ ڪميشن جي رپورٽ ۾ تڏهوڪي پنجاب جي وڏي وزير ۽ هاڻوڪي وزيراعظم کي ڏوهي/ذميوار قرار ڏيڻ جي به مخالفت ڪئي. هن الزام مڙهيو ته جنرل (ر) فيض احمد ڌرڻي جو ماسٽر مائينڊ هو پر ان کي ڪلين چٽ ڏني وئي آهي. پروگرام ۾ ڳالهائيندي پي آءِ ٽي اڳواڻ شيخ وقاص چيو ته رپورٽ کي منظر عام تي آندو وڃي ۽ ان جي روشني ۾ ملوث ماڻهن خلاف ڪارروائي ٿيڻ گهرجي.
