ٺٽو(رپورٽ: منصور جلالاڻي) سنڌ جي زمينن تي والار، سمنڊ ٻيٽن درياءُ ۽ وسيلن تي قبضي ۽ منشيات جي وڪري خلاف ٺٽي ۾ جسقم چيئرمين صنعان خان قريشي جي اڳواڻي ۾ زبردست احتجاجي ريلي ايڌي سينٽر ٺٽو کان جسقم چيئرمين صنعان قريشي، ڊاڪٽر غلام سرور خشڪ، ڊاڪٽر نياز ڪالاڻي، بابو جان خشڪ، غلام نبي کٽي، اسد گوپانگ، محمد علي شيخ ۽ ٻين جي اڳواڻي ۾ ريلي ڪڍي وئي، ريلي قومي شاھراھ جو گشت ڪندي ٺٽي جي مين رڪشا اسٽاپ تي پهچي قومي شاهراھ تي ڌرڻو هنيو، جسقم چيئرمين صنعان خان قريشي خطاب ڪندي چيو ته سنڌ کي ڪيڪ سمجهي ڪاٽي سنڌ جي قيمتي زمينن تي والار ڪئي پئي وئي وڃي، سامونڊي ۽ ڪوهستاني زمينو لينڊ مافيا هٿان والارجي رهيون آھن، سامونڊي ٻيٽن درياءُ ۽ اسان جي سنڌ جي وسيلن جبلن ۽ معدنيات تي قبضو ڪيو ويو آھي ۽ ڌارين کي آباد ڪرايو پيو وڃي، هٿ وٺي سڄي سنڌ ۾ منشيات کي عام ڪري نوجوان نسل کي تباھ ڪيو پيو وڃي جيڪو هڪ قومي الميو آھي، سنڌ جي بنيادي حقن جي حاصلات زمينن تي والار منشيات جي ڪاروبار پاڻي تي ڌاڙي توڙي تڪراري منصوبن کي فوري طور بند ڪرائڻ جي گُھر ڪندي اعلان ڪيو آھي ته جسقم پاران سنڌ سان ٿيندڙ ناانصافين خلاف مرحليوار تحريڪ جاري رکي ويندي، ھٿ وٺي ڌارين کي ڌرتي تي قابض ڪيو پيو وڃي سنڌ جي وسيلن تي ڌارين جو قبضو ڪرائڻ سان گڏ نوجوانن کي نشي جو عادي بنائڻ لا۽ کلي عام منشيات جو وڪرو جاري آھي چند قبضا گير ۽ منشات فروش رياست کان طاقتور ناھي پر رياست ھٿ وٺي سنڌ کي تباھ ڪري رھي آھي اقتدار جا شوقين سنڌ جي وسيلن ۽ نوجوانن جي موت جي پرواني تي راضي ٿي ويا آھن انھن کي سنڌ ۽ سنڌ جي نوجوانن کان وڌيڪ اقتدار آھي پر اسان کين سنڌ تي قبضو ڪرڻ نه ڏينداسين، سنڌ ۾ مسڪين ماڻھن لاءِ صحت جون سھولتون ناھن، تعليمي نظام تباھ پرائيوٽ اسپتالن ۽ اسڪول کي ھٿي ڏيئي ڪاروبار ڪيو وڃي پيو قدرتي وسيلن سان مالا مال سنڌ جي عوام کي پنڻ تي مجبور ڪيو آھي معصوم ٻارڙا چونڪن تي خيراتون پيا گھرن ۽ سنڌ جي وسيلن تي ڌارين کي عياشيون ڪرايون پيون وڃن، جسقم ھن صورتحال ۾ پنھنجي ماڻھن کي اڪيلو ڪو نه ڇڏيندي، اسان جي جھدوجھد اقتدار لاءِ نه سنڌ لاءِ اسان لاءِ اول ۽ آخر صرف سنڌ آھي، علمي، ادبي ۽ تاريخي شھر ٺٽو کي چورن، لوفرن، ڪرپٽ ڪامورن ۽ منشيات فروشن جي رحم ڪرم تي ڇڏيو ويو آھي ھزارين نوجوان نشي جا عادي ٿيڻ بعد مختلف ڏوھن جي ور چڙھي ويا آھن پر پوليس منٿليون وٺي ھٿ سان ڀرايون پئي ڪرائي. جسقم وائيس چيئرمين ڊاڪٽر غلام سرور خشڪ خطاب ڪندي چيو ته سنڌ جي وسيلن تي ڌارين جو قبضو آھي، پيپلز پارٽي سندن سھولتڪار بڻيل آھي. ھن چيو ته ھڪ طرف ڪينجھر ڍنڍ مان ڪراچي کي روزانو پاڻي فراھم ٿي رھيو آھي ته ٻئي طرف ٺٽي جا ماڻھو مھينن کان پيئڻ جي پاڻي لاءِ ترسي رھيا آھن، ٺٽي جي ڪوھستاني ۽ سامونڊي پٽي جي ھزارين ايڪڙ زمين ڀڳڙن مٺ عيوض غير مقامي ماڻھن حوالي ڪئي پئي وڃي، جسقم جي سينيئر اڳواڻ ڊاڪٽر نياز ڪالاڻي خطاب ڪندي چيو ته جيڪي اليڪشن کٽي آيا آھن اھي سنڌ جا نمائندا ناھن سنڌ جا نمائندا ڳاڙھي جھنڊي وارا آھن، اسيمبلي سنڌ جي آھي پر ان کان وڌيڪ ٻي بي حسي ڪھڙي ٿيندي جو سنڌ اسيمبلي ۾ افغاني پٽڪو پائي اچي حلف کڻي ٿو. سنڌ حڪومت ڌارين کي سگھارو ڪيو آھي. ان موقعي تي جسقم جي مرڪزي اڳواڻن ديدار شام، مومن سمون جساف جو مرڪزي صدر اشرف ڪلهوڙو، غلام نبي کٽي، نظام جوکيو، اسد گوپانگ، بابو جان خشڪ، سراج سرور خشڪ، محمد علي شيخ ۽ ٻين پڻ خطاب ڪيو.
