ڪراچي (رپورٽر) سنڌ هاءِ ڪورٽ جي چيف جسٽس عقيل احمد عباسي ۽ جسٽس مبين لاکي تي ٻڌل ٻه رڪني بينچ ۾ ڪتن جي چڪ کان بچاءُ واري ويڪسين جي کوٽ جي ڪيس جي ٻڌڻي ٿي، عدالت سخت ڪاوڙ جو اظهار ڪندي چيف سيڪريٽري سنڌ، اينٽي ريبيز پروگرام سنڌ ۽ سيڪريٽري لوڪل گورنمينٽ کان 10 فيبروري تائين رپورٽ طلب ڪري ورتي، درخواستگذار وڪيل طارق منصور چيو ته سنڌ جي مختلف ضلعن ۾ هر روز سوين ماڻهو ڪتن جي چڪ جو شڪار ٿين ٿا، ڪراچي سميت سنڌ جي 32 ضلعن جي 432 اسپتالن ۾ ويڪسين موجود ناهي، وڪيل طارق منصور جو چوڻ هو ته هر روز 150 سئو کان وڌيڪ ماڻهو جناح ۽ سول اسپتال ۾ ڪتن جي حملن جو شڪار ٿي اچن ٿا، ڪراچي ۾ سرجاڻي ٽائون، اورنگي ٽائون، ملير قائدآباد ۽ ٻين علائقن ۾ ڪتن جي چڪ جو شڪار ٿي رهيا آهن، وڪيل طارق منصور چيو ته 4 سال اڳ اينٽي ريبيز پروگرام قائم ڪيو ويو جيڪو اڃا تائين غير فعال آهي، اربين روپين جي بجيٽ رکي وئي پر اسپتالن ۾ ڪتي جي چڪ کان بچاءُ ويڪسين موجود ناهي، ايڊووڪيٽ طارق منصورچيو ته اينٽي ريبيزم پروگرام لاءِ قائم ڪيل هيلپ لائن به غير فعال آهي، ماڻهو بدوائون ڏئي رهيا آهن.
