ڪراچي (ويب ڊيسڪ) ملڪ ۾ هلندڙ مهيني جي آخري هفتي ۾ برساتن جي خوشخبري ٻڌائي وئي.
چيف ميٽولوجسٽ چوڌري اسلم چيو آهي ته هن هفتي سخت ڪوهيڙو پوڻ جو امڪان آهي ۽ ٿڌ جي شدت ۾ به واڌ ٿيندي.
موسميات کاتي جو چوڻ آهي ته ايندڙ ڪجهه ڏينهن دوران پنجاب،خيبرپختونخواهه، سنڌ ۽ اسلام آباد جي ميداني علائقن ۾ ڪوهيڙو رهندو.
ان ڏس ۾ شهرين کي احتياط ڪرڻ جي هدايت ڪئي وئي آهي.
پنجاب جي اڪثر علائقن ۾ ڪوهيڙي سبب ڏينهن جو گرمي پد معمول کان هيٺ رهندو.
موسميات کاتي موجب سڀاڻي ملڪ جي اڪثر ميداني علائقن ۾ موسم ٿڌو ۽ خشڪ رهندو، جڏهن ته اترين علائقن ۾ ٿڌ وڌندي.
ڪشمير ۾ صبح جي وقت ڪجهه هنڌن تي ڪوهيڙو پوڻ جو امڪان آهي.
اڄ ملڪ جي اڪثر علائقن ۾ موسم ٿڌو ۽ خشڪ رهيو جڏهن ته ڪراچي ۾ صبح هلڪي ڦڙ ڦڙ به پئي.