اوٻاوڙو (ويب ڊيسڪ) اوٻاوڙو ڀرسان پنجاب جي علائقي ماڇڪو ٿاڻي جي حد ۾ ڌاڙيلن حملو ڪري عورت سميت 5 ڄڻن کي قتل ڪري ڇڏيو، پوليس مقابلي ۾ 4 ڌاڙيل مارجي ويا جڏهن ته مقابلي دوران 2 پوليس اهلڪار شهيد ۽ ٻه زخمي ٿي پيا.
ڳوٺ حسين سولنگي ۾ ڪمند جي فصل ۾ لڪيل ڌاڙيلن حملو ڪري هڪ عورت سميت 5 ڄڻن کي قتل ڪري ڇڏيو. مقتولن ۾ ۾ واٽهڙو عورت حميدان سيلرو، پرويز سولنگي، شعبان سولنگي ۽ ٻيا شامل آهن.
ڌاڙيلن جي حملي کان پوءِ پوليس جو ڌاڙيلن سان مقابلو ٿيو جنهن ۾ 4 ڌاڙيل مارجي ويا جن ۾ بدنام ڌاڙيل سلطو شر جو ڀاءُ عمر شر، ڌاڙيل ڪرم علي ڪوش ۽ ٻيا شامل آهن.
مقابلي دوران ڌاڙيل جديد هٿيارن جو استعمال ڪندا رهيا مقابلي دوران ٻه پوليس اهلڪار به شهيد ٿي ويا جڏهن ته 2 زخمي ٿي پيا.
ذريعن موجب ڪجهه مهينا اڳ کنڀڙا پوليس هٿان 4 ڌاڙيل مبينا مقابلي ۾ مارجي ويا هئا جنهن جو پلاند وٺڻ ڌاڙيلن پاران اڄ حملو ڪيو ويو.
پوليس جو چوڻ آهي ته مارجي ويلن جا لاش اسپتال منتقل ڪيا ويا آهن.
