اسلام آباد (ويب ڊيسڪ) نگران وفاقي گھرو وزير سرفراز بگٽي پي ٽي آءِ چيئرمين کي عدليا جو لاڏلو قرار ڏيندي چيو آهي ته عمران خان کي جيل ۾ ڏنل سهولتن جو عام شهري تصور نٿو ڪري سگھي.
پرڏيهي خابرو اداري کي ڏنل انٽرويو ۾ سرفراز بگٽي جو چوڻ هو عمران خان کي جيل ۾ ڏنل سهولتن جو عام شهري تصور نٿو ڪري سگھي، عمران خان جي سائفر ڪيس ۾ 28 نومبر تي پيشي جي حوالي سان عدالت جي حڪم کي جيئن جو تيئن تلسيم ڪنداسين.
هن چيو ته منهنجي خيال ۾ نواز شريف تي جيڪي ڪيسز ٺهيا اهي گھڻو ڪري بنياد هئا ۽ تاريخ ۾ اهو پهريون ڀيرو هوندو جو پٽ کان پگھار نه وٺڻ جي ڏوهه ۾ ڪو نااهل ٿيو هجي.
سرفراز بگٽي جو چوڻ هو ته نگران حڪومت طرفان ن ليگ کي ڪا به فيور نه پئي ڏني وڃي، حڪومت لاءِ نواز شريف ۽ بلاول ڀٽو زرداري هڪ جهڙا ۽ احترام جوڳا آهن جڏهن ته چونڊن بابت گھرو وزارت اليڪشن ڪميشن کي هر قسم جي سهڪار جي خاطري ڪرائي آهي.
سندس چوڻ هو ته هيل تائين تقريبن 3 لک غير قانوني پرڏيهي واپس پنهنجي ملڪ موٽي چڪا آهن، اهو عمل هڪ مهيني ۾ مڪمل ٿي ويندو، واپس ويندڙن ۾ 99 سيڪڙو کان وڌيڪ انگ افغان پناهگيرن جو آهي.
وفاقي وزير چيو ته پاڪستان ۾ افسوسناڪ واقعن ۾ را جو ڪردار رهندو آهي، ان ۾ ڪي به ٻه راءِ ناهن ته پاڪستان فالٽ لائنز ۾ ملڪ مخالف ايجنسيون سدائين اضافو ڪرڻ جي ڪوشش ڪنديون آهن جڏهن ته گلگت بلتستان، جڙانوالا ۽ ٻين هنڌن تي سازش لنڪ ڪنهن ٻئي هنڌ سان ملي ٿو، اسان بدقسمت ماڻهو آهيون جو ان جي وڪڙ ۾ اچي ويندا آهيون.
سرفراز بگٽي چيو ته گم ٿيلن جي معاملي تي عدالت جو نگران وزيراعظم کي گھرائڻ مناسب عمل ناهي، پاڪستان ۾ گم ٿيلن جو انگ خطي ۾ سڀ کان گھٽ آهي ۽ گم ٿيلن جو معاملو ملڪ جي خلاف پروپيگينڊا جو هٿيار بڻجي چڪو آهي، جيترن گم ٿيلن جي لسٽ ڏني وئي انهن مان 78 سيڪڙو ڪيس حل ٿي چڪا آهن.
