اسلام آباد (ويب ڊيسڪ) آئل اينڊ گئس ريگيوليٽري اٿارٽي (اوگرا) پيٽروليم شين جي اگهن بابت هلندڙ خبرن تي بيان جاري ڪري ڇڏيو.
اوگرا ترجمان طرفان جاري ڪيل بيان ۾ چيو ويو آهي ته اٿارٽي پيٽروليم شين جي اگهن بابت اڳڪٿين کان بچڻ جي اهميت تي زور ڏئي ٿي، پيٽروليم شين جي اگهن جو دارومدار عالمي قيمتن ۽ ڊالر جي مٽاسٽا جي شرح تي آهي ۽ تازن ڏينهن ۾ عالمي سطح تي پيٽروليم شين جي اگهن ۾ واڌ ڏٺي وئي.
ترجمان موجب ملڪ ۾ ڊالر جي ڀيٽ ۾ رپئي جي قدر ۾ بهتري آئي آهي ۽ پيٽروليم شين جي نون اگهن جي اعلان ۾ اڃا هڪ هفتو باقي آهي، تنهن ڪري اگهن جي حوالي سان اڳڪٿيون تيل جي سپلاءِ چين ۾ خلل وجهي سگهن ٿيون.
