ڪراچي (ويب ڊيسڪ) سرڪاري، نجي ميڊيڪل ۽ ڊينٽل ڪاليجن جي وڌيڪ فيسن جي معاملي ۾ اهم اڳڀرائي سامهون آئي آهي ۽ تعليمي ادارن جي فيسن ۾ وڏو فرق ختم ڪرڻ جو فيصلو ڪيو ويو آهي.
ذريعن موجب حڪومت فيصلو ڪيو آهي ته ميڊيڪل ۽ ڊينٽل ڪاليجن جي فيسن بابت قاعدا ٺاهيا ويندا.
ذريعن جو چوڻ آهي ته انهن ڪاليجن جي فيسن بابت خاص ڪميٽي قائم ڪئي وئي آهي، ڄاڻايل ڪميٽي نيشنل ميڊيڪل ۽ ڊينٽل اڪيڊمڪ بورڊ جي حڪم تي قائم ڪئي وئي آهي.
پي ايم ڊي سي جي ذريعن موجب پروفيسر ڊاڪٽر ضياءُ الحق 5 رڪني ڪميٽي جو سربراهه مقرر ڪيو ويو آهي، ڪميٽي سرڪاري، نجي ميڊيڪل ۽ ڊينٽل ڪاليجن جي انتظاميا کان فيس اسٽرڪچر طلب ڪندي.
ذريعن جو چوڻ آهي ته ميڊيڪل ۽ ڊينٽل ڪاليجن کان 2020 کانپوءِ فيس اسٽرڪچر طلب ڪيو ويندو، ڪميٽي انهن ڪاليجن جي فيس اسٽرڪچر جي جاچ ڪندي.
ان کانسواءِ ڪميٽي فيسن بابت سفارشون نيشنل ميڊيڪل ۽ ڊينٽل اڪيڊمڪ بورڊ کي ڏيندي، جنهن کانپوءِ انهن ڪاليجن جي فيسن لاءِ قاعدا ۽ ضابطا ٺاهيا ويندا.
ذريعن جو چوڻ آهي ته فيس پاليسي بابت حتمي فيصلو نيشنل ميڊيڪل ۽ ڊينٽل اڪيڊمڪ بورڊ ڪندو، ڄاڻايل ڪاليج ساليانو 30 لک رپين تائين فيس وٺي رهيا آهن، جڏهن ته اوورسيز سيٽ تي 18 هزار ڊالرن تائين سالياني فيس وصول ڪئي پئي وڃي.
