ڪولمبو ( ويب ڊيسڪ ) سريلنڪا جي راڄڌاني ڪولمبو ۾ رات کان تيز برسات جو سلسلو جاري آهي.
سريلنڪا جي موسميات کاتي ڪولمبو ۾ ايندڙ ڏينهن دوران برسات جي اڳڪٿي ڪئي آهي جنهن سبب ايشيا ڪپ جون ميچون متاثر ٿيڻ جو خدشو آهي.
ڪولمبو۾ سُپر فور مرحلي جون ميچون نوَ سپٽيمبر کان شروع ٿينديون، پاڪستان سريلنڪا ۽ بنگلاديش جون ٽيمون اڄ ڪولمبو پهچنديون جڏهن ته ڀارتي ٽيم پهريان ئي ڪينڊي کان ڪولمبو پهچي چڪي آهي.
ياد رهي ته ڪولمبو ۾ ڏينهن تائين تيز برسات جي اڳڪٿي ڪئي وئي آهي، جيڪڏهن سُپر فور مرحلي جي ڪا به ميچ نه ٿي ته پاڪستان پهرين پوزيشن تي ئي رهندو.
ڪولمبو ۾ تمام ميچز واش آئوٽ ٿيڻ تي پاڪستان فائنل لاءِ ڪواليفاءِ ڪري ويندو، اهڙي صورتحال ۾ سريلنڪا ۽ ڀارت جا پوائنٽ برابر هوندا، ميچز واش آئوٽ ٿيڻ جي صورت ۾ نيٽ رن ريٽ لاڳو نه ٿيندو پر پوائنٽ جي برابري ۽ رن ريٽ نه هئڻ تي ٻي ٽيم جو فيصلو ٽاس تي ٿيندو.
ايشيا ڪپ جو فائنل 17 سٽيمبر تي کيڏيو ويندو ۽ ڪولمبو ۾ 17 سپٽيمبر تي به برسات جو امڪان ظاهر ڪيو ويو آهي، جيڪڏهن فائنل به برسات سبب نه ٿي سگهيو ته ٻنهي ٽيمن کي گڏيل طور فاتح قرار ڏنو ويندو.
