هونئن ته هر ميوو قدرت جو بهترين تحفو آهن جنهن ۾ ڪنهن نه ڪنهن مخصوص فائدي سميت ڪيترائي فائدا موجود هوندا آهن نه رڳو ايترو پر سڀ ڪنهن ميوي جو ذائقو الڳ هوندو آهي جنهن جا به ڪيترائي فائدا آهن ۽ ذائقي جي حساب سان به ڪيترائي ميوا ماڻهن جي پسند هوندا آهن.
عوامي آواز پنهنجي پڙهندڙن لاءِ وڏي عرصي کان مختلف ميون جي خاصيتن ۽ فائدن بابت ڄاڻ ڏيندي رهندي آهي ته جيئن انهن کي پنهنجي زندگي ۾ شامل ڪري مختلف مسئلن جو حَل ڪري سگهجي ۽ صحت جا فائدا ماڻي سگهجن.
اڄ اسان جنهن ميوي جي ڳالهه ڪنداسين اهو آهي ڄمون. ان جو رنگ تيز يا ڪارو ناسي چئي سگهجي ٿو پر ان ميوي جي ڪري ئي ان رنگ کي ڄَمون جو رنگ چيو ويندو آهي.
ڄمون جو ذائقو کٽو مٺو هوندو آهي ۽ ٻنهي گڏيل ذائقن جي ڪري ڄمون ننڍي ٻارن توڙي وڏن ماڻهن جو وڻندڙ ميوو آهي.
سانوڻ جي موسم ۾ اهو کٽو مٺو ڄَمون کائڻ سخت گرمي گهٽائڻ لاءِ وڏو فائديمند هوندو آهي، اهو ميوو ٿڌو هجڻ ڪري معدي ۽ جسم کي ٿڌو رکي گرمي ۾ بچائڻ جو بهترين ذريعو بڻبو آهي.
پر ڄَمون ۾ اهڙا فائدا آهن جيڪي توهان کي دنگ ڪري ڇڏيندا.
- ڄمون ۾ قدرتي طور تي اينٽي آڪسيڊنٽس موجود هوندا آهن جيڪي اسان جي جسم جي سوڄ کي ختم ڪرڻ ۾ وڏي مدد ڪندا آهن ۽ جسم کي انفيڪشن جهڙي مسئلن کان محفوظ رکندا آهن.
- ڄمون وٽامن سي ۽ آئرن سان به ڀرپور هوندو آهي جيڪڏهن ڪنهن به ماڻهو ۾ آئرن يا وٽامن سي جي کوٽ هجي ته انکي پنهنجي خوراڪ ۾ ڄَمن کي شامل ڪرڻ گهرجي.
- ڄمن جو جسم جي رت وڌائڻ ۾ به اهم ڪردار هوندو آهي.
- ڄمون رت کي صاف ڪندو آهي ۽ رت مان بيڪٽيريا جو خاتمو ڪندا آهن جنهن جي ڪري رت جي فائدن سميت چهري جي چمڙي صاف ٿيندي آهي ۽ منهن تان موهيڙا وغيره ختم ٿيندا آهن ۽ چهرو خوبصورت نظر ايندو آهي.
- ڄَمن جو شربت جسم مان پاڻي جي کوٽ ختم ڪندو آهي ۽ ماڻهوءَ کي تازو توانو رکندو آهي.
- ڄَمن جي رس يا رس وارا ڄَمون غذائيت سان ڀرپور هوندا آهن. ڄَمون فائبر جو به بهترين ذريعو هوندا آهن ڄمن جو استعمال پيٽ جي سور، تيزابيت، سيني جي ساڙي ۽ قبضي جي مسئلن مان ڇوٽڪارو ڏيارڻ ۾ به وڏو مددگار ثابت ٿيندو آهي.
- ڄمون ڪوليسٽرول ۽ بلڊ پريشر جي سطح کي گهٽائڻ ۾ مدد ڏيندا آهن جيڪي دل جي بيمارين جي لاءِ اهم خطرو هجن ٿا. هاءِ بلڊ پريشر ۽ وڌيل ڪوليسٽرول واري ماڻهن کي ڄمن جو استعمال ڪرڻ گهرجھي.
انهن فائدن سميت ڄَمون جو ٻيو هڪ اهم فائدو به مڃيو ويندو آهي. جنهن بابت اهو چيو ويندو آهي ته پاڻ سڳورن صلعم جن ڄَمون جي مختلف فائدن سميت ان جو اهو فائدو به ٻڌايو آهي.
مختلف کاڌا پچائڻ، ماني جي لاءِ اٽو ڳوهڻ وغيره دوران خاص ڪري عورتن جا وار کاڌن پيتن ۾ ملي وڃڻ عام ڳالهه هوندي آهي، اهو سڀني سان ٿيو هوندو ته اهي ماني توڙي ٻين ڀاڄين مان ڪيترائي ڀيرا وار ڪڍندا رهندا آهن.
وڏا وار ته نظر اچڻ جي باوجود به هٿ يا وات ۾ ئي محسوس ٿيندا آهن پر ماڻهو وارن جا ڪيترائي ننڍا ٽڪرا ماني سان ملجي کائي ويندو آهي. جيئن ته وار جو ڳرڻ انتهائي ڏکيو هوندو آهي جڏهن ته وزن نه هجڻ جي ڪري اهو معدي توڙي آنڊن ۾چمڙي هضم ٿيڻ کان بچي سگهي ٿو ۽ مختلف بيمارين جو به سبب بڻجي سگهي ٿو.
پر ڄَمون کائڻ سان کاڌي پيتي سان گڏ کاڌا ويندڙ وار پيٽ ۾ ئي ڳري ويندا آهن جيڪو فائدو شايد ئي ڪنهن ٻئي ميوي ۾ هجي.
