ٽِين ٽيسٽ کان اڳ پاڪستاني ٽيم ۾ اُٿل پُٿل، مائڪ هيسن اهم ڳالهين تان پردو کڻي ڇڏيو
برمنگهم ۾ پريس ڪانفرنس ڪندي مائڪ هيسن چيو ته ٽِين ٽيسٽ لاءِ آيا آهيون ۽ رانديگرن جو مڪمل ڌيان ٽيسٽ تي آهي.
هن چيو ته مان في الحال عارضي ريڊ بال ڪوچ آهيان، جپان ۾ ايشيئن گيمز جي تياري لاءِ موجود هئس، لاهور اچڻ تي مون کي ريڊ بال جي عبوري ذميواري سنڀالڻ جي درخواست ڪئي وئي.
هيڊ ڪوچ مائڪ هيسن چيو ته ٽِين ٽيسٽ لاءِ متوازن اسڪواڊ ٺاهڻ هدف آهي، 3 رانديگرن کي رليز ڪيو ويو، جن سان مون کي ڳالهائڻ جو موقعو به نه مليو.
هن چيو ته رانديگرن جي اچڻ ۽ وڃڻ سبب صورتحال مختلف آهي، جن شين تي ڪنٽرول ناهي، انهن بابت سوچي نٿا سگهون، نوان نوجوان رانديگر آيا آهن، جن سان پاڪستاني بالنگ اٽيڪ وڌيڪ بهتر نظر ايندو.
مائڪ هيسن چيو ته مون کي ٽنهي رانديگرن کي رليز ڪرڻ جي ڪارڻ بابت ڄاڻ ناهي، سلمان علي آغا بهترين رانديگر آهن، هو علائقائي ڪرڪيٽ ۾ پنهنجو اعتماد ٻيهر بحال ڪندو.
هيڊ ڪوچ چيو ته تاريخ ۾ پاڪستان هميشه فاسٽ بالر هجڻ سبب ڄاتو ويندو آهي، فاسٽ بالرن کي شامل ڪري پاڪستان پنهنجو ٽيلنٽ ڏيکارڻ چاهي ٿو.
هن اهو به چيو ته ماڻهو عجيب ڪهاڻيون ٺاهي رهيا آهن، سڀ پنهنجي پنهنجي ڳالهيون ٺاهي رهيا آهن، عمر گل شاندار بالر هو، کيس ڪڍڻ جو فيصلو منهنجو ناهي.
سندس چوڻ هو ته سعد بيگ رضوان جي جاءِ ورتي آهي، هو ٻئي وڪيٽ ڪيپر طور اسڪواڊ ۾ موجود آهي، علي عثمان باصلاحيت بالر آهي، پر ڪنڊيشنز موجب اسپنر کي رڳو 2 اوورن لاءِ چونڊي نٿا سگهون.
مائڪ هيسن چيو ته انگلينڊ وٽ فاسٽ بالرن جا ڪافي آپشن موجود آهن، محمد عباس انگلينڊ جي دوري تي شاندار بالنگ ڪئي آهي، مان ڪجهه ريڊ بال رانديگرن سان گڏ ڪم ڪري چڪو آهيان، رانديگر مايوس ضرور آهن، پر اسان کي اڳتي ڏسڻو آهي.
