تهران (ويب ڊيسڪ) ايراني پرڏيهي وزير عباس عراقچي پنهنجي اردني هم منصب جي تازن بيانن تي ردعمل ڏيندي سوال ڪيو آهي ته ”اردني پرڏيهي وزير جي راءِ ۾ ايران کي اهڙي اڳرائيءَ جواب ڏيڻ لاءِ ڪيترو انتظار ڪرڻ گهرجي، جيڪو نه عرب ۽ نه ئي ايراني خودمختياري جو احترام ڪري ٿو؟“
ايڪس تي جاري ڪيل بيان ۾ عباس عراقچي چيو ته ايران تي آمريڪا جي شروعاتي حملن دوران عرب ملڪن جي هوائي، زميني ۽ سامونڊي حدن کي استعمال ڪيو ويو هو، جڏهن ته هن اردني پرڏيهي وزير تي اڻڄاڻائي جو الزام پڻ لڳايو.
واضح رهي ته گذريل ڏينهن هڪ سرڪاري بيان ۾ اردن جي پرڏيهي وزارت ڪويت تي ايران جي حملن کي وحشياڻو قرار ڏيندي چيو هو ته اهي حملا قومي خودمختياري جي کليل خلاف ورزي، سلامتي، استحڪام ۽ علائقائي سالميت لاءِ خطرو ۽ بين الاقوامي قانون ۽ گڏيل قومن جي چارٽر جي کليل ڀڃڪڙي آهن.
ٻئي پاسي قطر جي پرڏيهي وزارت ڪويت سان ايڪي جو اظهار ڪندي هڪ بيان ۾ چيو هو ته اهي حملا ڇڪتاڻ گهٽائڻ جي ڪوششن کي پيچيده بڻائين ٿا ۽ خطي ۾ سلامتي ۽ استحڪام کي يقيني بڻائڻ لاءِ جاري سفارتي ڪوششن کي نقصان پهچائي سگهن ٿا.
