جنيوا (ويب ڊيسڪ) گڏيل قومن جي موسمياتي اداري خميس ڏينهن خبردار ڪيو آهي ته ايل نينو لهر ايندڙ مهينن دوران ”انتهائي طاقتور“ ٿي ويندي ۽ امڪان آهي ته اِها فيبروري تائين جاري رهندي.
واضح رهي ته ايل نينو هڪ فطري موسمياتي رجحان آهي ۽ اهو موسمياتي تبديلي سبب پيدا نٿو ٿئي، تنهن هوندي به سائنسدانن جو چوڻ آهي ته اهو اڳ ئي گرم ٿيندڙ ڌرتيءَ جو گرمي پد ۽ موسم جي شدت کي وڌيڪ وڌائيندو.
پرڏيهي ميڊيا رپورٽ موجب، ايل نينو وچولي ۽ اوڀر واري خط استوا واري پئسفڪ سمنڊ جي مٿاڇري جو گرمي پد وڌائيندو آهي، جنهن سبب سڄي دنيا ۾ هوائن، هوا جي دٻاءَ ۽ برساتن جي نمونن ۾ تبديلي اچي ٿي، اهو عام طور هر ٻن کان ستن سالن کانپوءِ ٿيندو آهي ۽ 9 کان 12 مهينن تائين جاري رهندو آهي.
عالمي موسمياتي تنظيم خميس ڏينهن چيو ته ايل نينو هن سال جي آخر تائين پنهنجي عروج تي پهچي ويندو، جڏهن ته ان جا موسمي اثر 2027ع تائين جاري رهندا.
اداري موجب، ايل نينو مڪمل طور تي قائم ٿي چڪو آهي ۽ ايندڙ مهينن ۾ انتهائي طاقتور ٿيڻ وارو آهي، جنهن جي نتيجي ۾ برسات ۽ گرمي پد تي وڏا اثر پوندا ۽ ٻوڏ، ڏڪار ۽ شديد گرمي جا خطرا وڌندا.
گڏيل قومن جي سربراهه انتونيو گوتريس جو چوڻ آهي ته ايل نينو اسان جي اکين اڳيان غيرمعمولي حد تائين وڌي رهيو آهي.
هن چيو ته سائنس ۾ ڪو شڪ ناهي ته ڌرتي اڻڄاتل پاڻيءَ ۾ داخل ٿي چڪي آهي ۽ اهو پاڻي گرم ٿي رهيو آهي، سامونڊي سطح جو گرمي پد وڌي رهيو آهي، زميني گرمي پد مسلسل مٿي وڃي رهيو آهي ۽ دنيا شديد موسمي خطرن واري علائقي ۾ آهي، هاڻي مقابلو وڌندڙ خطرن ۽ اسان جي موسمياتي قدمن وچ ۾ آهي، اسان کي هي مقابلو کٽڻو پوندو.
ايل نينو عام طور سال جي آخر ۾ پنهنجي عروج تي پهچندو آهي، پر سامونڊي گرمي هوريان هوريان فضا ۾ منتقل ٿيندي آهي، جنهن سبب ايندڙ سال عالمي گرمي پد ۾ وڌيڪ واڌ ٿيندي آهي.
رڪارڊ موجب، سڀ کان وڌيڪ گرم سال 2024ع رهيو، جيڪو گذريل ايل نينو کانپوءِ آيو هو.
عالمي موسمياتي تنظيم جي سربراهه سيلسٽ سائولو چيو ته هي غيرمعمولي ايل نينو سڄي دنيا جي ماڻهن ۽ معيشتن لاءِ ڪاپاري ڌڪ ثابت ٿيڻ جي صلاحيت رکي ٿو، اسان اڳ ئي ڏڪار ۽ ٻوڏ سبب تباهي ڏسي رهيا آهيون ۽ جيئن جيئن ايل نينو وڌيڪ شدت اختيار ڪندو، اهي اثر به وڌيڪ وڌندا.
هن آفتن کي منهن ڏيندڙ ادارن ۽ زراعت، صحت، توانائي ۽ پاڻي جهڙن حساس شعبن کي خبردار ڪيو ته تياري لاءِ وقت وڃائڻ جي ڪا گنجائش ناهي.
عالمي موسمياتي تنظيم موجب، غيرمعمولي طور گرم پئسفڪ سمنڊ جي مٿاڇري واري صورتحال سبب ايل نينو ايندڙ مهينن ۾ وڌيڪ طاقتور ٿي انتهائي شدت تائين پهچڻ جي اميد آهي.
ادارو ايل نينو کي چئن درجن ۾ ورهائي ٿو، ڪمزور، وچولي، طاقتور ۽ انتهائي طاقتور، جڏهن ته موجودا ايل نينو سڀ کان بلند درجي تائين پهچڻ وارو آهي.
عالمي موسمياتي تنظيم چيو آهي ته ”چٽو امڪان، لڳ ڀڳ 100 سيڪڙو“ آهي ته ايل نينو فيبروري تائين جاري رهندو.
