دبئي (ويب ڊيسڪ) ايشين ڪرڪيٽ ڪائونسل (اي سي سي) وومينز ٽي ٽوئنٽي ايشيا ڪپ 2026ع جو شيڊيول جاري ڪري ڇڏيو آهي، جنهن موجب ٽورنامينٽ 28 آگسٽ کان دبئي ۾ شروع ٿيندي.
اٺ ٽيمن تي ٻڌل ٽورنامينٽ جي شروعات گروپ اي جي مقابلي سان ٿيندي، جنهن ۾ هانگ ڪانگ (چائنا) ۽ ٿائيلينڊ جون ٽيمون آمهون سامهون ٿينديون.
ميگا ايونٽ جو سڀ کان وڏو دنگل ڀارت ۽ پاڪستان ۾ ميچ 5 سيپٽمبر تي دبئي ۾ ٿيندو.
ٽورنامينٽ جون هڙئي ميچون رات جي روشني هيٺ کيڏيون وينديون، جڏهن ته فائنل 13 سيپٽمبر تي ٿيندو.
شيڊيول موجب، سڀئي ميچون دبئي انٽرنيشنل ڪرڪيٽ اسٽيڊيم ۾ مقامي وقت موجب شام ساڍي ڇهين وڳي شروع ٿينديون.
گروپ بي ۾ سريلنڪا ۽ بنگلاديش وچ ۾ مقابلو 6 سيپٽمبر تي ٿيندو، جڏهن ته انڊونيشيا ۽ ميزبان گڏيل عرب امارات (يو اَي اِي) به ساڳئي گروپ ۾ شامل آهن.
گروپ مرحلي ۾ هر ٽيم هڪ ٻئي خلاف هڪ ميچون کيڏندي، جنهن کانپوءِ ٻنهي گروپن مان ٽاپ ٻه ٽيمون سيمي فائنل لاءِ ڪواليفاءِ ڪنديون.
سيمي فائنل مقابلا 10 ۽ 11 سيپٽمبر تي ٿيندا، جڏهن ته فائنل 13 سيپٽمبر تي کيڏيو ويندو.
هي وومينز ايشيا ڪپ جو ٽي ٽوئنٽي فارميٽ ۾ ڇهون ايڊيشن آهي، جڏهن ته سريلنڪن وومين ٽيم پنهنجي اعزاز جو دفاع ڪندي.
