نوابشاهه ( خاص عيوضي) سنڌ پبلڪ سروس ڪميشن ۾ ميرٽ جي لتاڙ خلاف تحريڪ جو دائرو وڌي رھيو آھي سنڌ جي ٻئي وڏي شھر حيدرآباد کان پوءِ نوابشاھ ۾ ايم آر ايم تحريڪ جي بينر ھيٺ وڏو احتجاج ٿيو آھي . شاگردن ،سول سوسائٽي ۽ ٻين سماجي توڙي سياسي تنظيمن ايڇ.ايم خواجا لائبريري کان نوابشاھ پريس ڪلب تائين ريلي ڪڍي. ھن ريلي حيدرآباد ۾ لڳل ڌرڻي جي حمايت ڪندي اھو مطالبو ڪيو ويو تہ ايس.پي.ايس.سي ۾ ميرٽ کي يقيني بڻائيندي 2024 واري چٽاڀيٽي واري امتحان جي نتيجن کي رد ڪري ھڪ صاف ۽ شفاف انڪوائري ڪرائي وڃي ۽ ڪرپشن ۾ ملوث آفيسرن کي انڪوائري جي دائري ۾ آندو وڃي.ھنن وڌيڪ چيو ته ايس.پي.ايس.سي ۾ سليبس کان ٻاھران سوال پڇيا ٿا وڃن جنھن ڪري ھن اداري ۾ مستقل تبديلي جي ضرورت آھي.ريلي جي اڳواڻي انضمام خاصخيلي عبدالمجيد مغيري، سعيد جوکيو، سلمان ڪيريو، افضل خاصخيلي، اسد علي، سلمان ڪيريو، بلال منگي، اسرار لنڊ، لال ڏنو، علي رضا چانڊيو ۽ ٻين ڪئي. جڏھن تہ شرڪت ڪندڙن ۾ ڪميونسٽ پارٽي جو اڳواڻ ذولفقار رستماڻي،ھاري ويلفيئر جو چيئرمين اڪرم خاصخيلي، تعليمدان فدا حُسين بلوچ ۽ ٻيا شامل ھئا.اڳواڻن وڌيڪ چيو ته مسئلو رڳو ايس پي ايس سي ناھي مسئلو ادارن اندر ۽ نوڪرين اندر ھلندڙ سفارش ڪلچر، رشوت ۽ پنھنجا نوازي آھي جنھن جو شڪار ھر نوجوان شاگرد تعليم حاصل ڪرڻ کان وٺي نوڪري حاصل ڪرڻ تائين ٿئي ٿو. تعليم کان نوڪرين تائين ڪرپٽ سرڪار منڊي لڳايو ويٺي آهي.
