اسلام آباد (ويب ڊيسڪ) پاڪستان سعودي عرب تي حوثين جي بيلسٽڪ ميزائل حملن جي سخت لفظن ۾ مذمت ڪندي چيو آهي ته سعودي عرب جي سلامتي، خودمختياري ۽ علائقائي سالميت لاءِ پاڪستان پنهنجي مڪمل حمايت جو عزم ورجائي ٿو.
گڏيل قومن جي سلامتي ڪائونسل جو وچ اوڀر (يمن) جي صورتحال تي هنگامي اجلاس ٿيو، جنهن ۾ پاڪستان جي نائب مستقل نمائندي عثمان جدون به خطاب ڪيو.
پاڪستان جي مستقل نمائندي عثمان جدون پنهنجي خطاب ۾ چيو ته پاڪستان سعودي عرب تي حوثين جي بيلسٽڪ ميزائل حملن جي سخت مذمت ڪري ٿو.
عثمان جدون چيو ته سعودي عرب جي سلامتي، خودمختياري ۽ علائقائي سالميت لاءِ پاڪستان پنهنجي مڪمل حمايت جو عزم ورجائي ٿو.
هن چيو ته پاڪستان يمن جي خودمختياري، آزادي، اتحاد ۽ علائقائي سالميت جي حمايت ڪري ٿو، جڏهن ته خطي ۾ وڌندڙ ڇڪتاڻ جي خاتمي لاءِ ڳالهين، سفارتڪاري ۽ تحمل جو رستو اختيار ڪرڻ گهرجي.
پاڪستان جي نائب مستقل نمائندي وڌيڪ چيو ته يمن ۾ پائيدار امن رڳو گڏيل سياسي عمل ذريعي ئي ممڪن آهي.
واضح رهي ته يمن ۾ ايران جي حمايت يافته حوثي گروپ دعويٰ ڪئي آهي ته هن سعودي عرب جي ابها بين الاقوامي هوائي اڏي کي بيلسٽڪ ميزائلن ۽ ڊرونز ذريعي نشانو بڻايو.
حوثين جي ترجمان يحييٰ سريع موجب، اها ڪارروائي صنعا بين الاقوامي هوائي اڏي تي سعودي حملن جي جواب ۾ ڪئي وئي.
ياد رهي ته گذريل سال سيپٽمبر ۾ پاڪستان ۽ سعودي عرب وچ ۾ دفاعي سهڪار ۽ سلامتي بابت اسٽريٽجڪ معاهدو ٿيو هو، جنهن تحت ڪنهن هڪ ملڪ خلاف بيروني جارحيت کي ٻنهي ملڪن خلاف جارحيت تصور ڪيو ويندو.
