اسلام آباد (ويب ڊيسڪ) ايف بي آر کي اهو اختيار ڏنو ويندو ته هو اهڙن سرڪاري ملازمن جي ڇنڊڇاڻ ۽ جاچ ڪئي وڃي جن جا اثاثا جائز آمدني ذريعن کان وڌيڪ هجن، خاص طور تي جيڪڏهن هو لاڳيتو ٽن سالن تائين اثاثن جا گوشوارا جمع ڪرائيندا رهن.
اسٽيبلشمينٽ ڊويزن جي سيڪريٽري ۽ ٻين اعليٰ عملدارن سينيٽ جي ناڻي ۽ ٽيڪس بابت اسٽينڊنگ ڪميٽي کي بريفنگ ڏيندي ٻڌايو ته هٿرادو ڏاهپ واري ٽيڪنالوجي (اَي آءِ ) تي ٻڌل نگراني وارو نظام سرڪاري آفيسرن جي دولت ۽ اثاثن ۾ غير معمولي واڌ تي ”ريڊ فليگ“ الرٽس جاري ڪندو.
وفاقي سيڪريٽري اسٽيبلشمينٽ ڊويزن، نبيل اعواڻ پارليامينٽ ميمبرن کي ٻڌايو ته ڊسمبر 2026 کان گريڊ 17 کان گريڊ 22 تائين جي سمورن سرڪاري آفيسرن جي اثاثن ۽ مالي تفصيلن کي هڪ ڊيجيٽل ڊڪليريشن سسٽم ذريعي عوام لاءِ دستياب ڪيو ويندو، جيڪو ايف بي آر جي مشوري سان تيار ڪيو پيو وڃي.
تجويز ڪيل نظام تحت سرڪاري آفيسرن کي پنهنجي خاندان جي اثاثن ۽ پرڏيهي دورن جا تفصيل پڻ فراهم ڪرڻا پوندا.
ايف بي آر جي اعليٰ اختيارين سميت چيئرمين ۽ ميمبر انلينڊ روينيو، کي اختيار هوندو ته هو اَي آءِ جي مدد سان ٿيندڙ ڇنڊڇاڻ دوران اثاثن ۾ شڪي يا غير معمولي واڌ جي صورت ۾ جاچ شروع ڪري سگهن.
