نئين دهلي (ويب ڊيسڪ) برڪس اجلاس کانپوءِ پريس ڪانفرنس ڪندي ايراني پرڏيهي وزير عباس عراقچي جو چوڻ هو ته آبناءَ هرمز ۾ ر رنڊڪن جو ذميوار ايران ناهي، جنگ جي شروعات ناهي ڪئي اسان رڳو پنهنجو دفاع ڪيو، اسان جنگ بندي برقرار رکڻ جي ڪوشش ڪري رهيا آهيون، آبناءَ هرمز رڳو انهن ملڪن لاءِ بند آهي جيڪي ايران خلاف جنگ ۾ ملوث هئا.
هن چيو ته ايران ڪنهن به دٻاءُ ۽ ڪارروائي خلاف ڀرپور مزاحمت ڪندو، 40 ڏينهن جي جنگ کانپوءِ آمريڪا کي ايران خلاف جارحيت مان ڪو به مقصد حاصل نه ٿيو ته پوءِ آمريڪا ڳالهين جي ڳالهه ڪئي، اسان کي آمريڪا تي قطعي ڀروسو ناهي، اسان وٽ آمريڪا تي اعتبار ڪرڻ جو ڪو به جواز ناهي.
عباس عراقچي جو چوڻ هو ته ايران جي ڪنهن به معاملي جو فوجي حل ناهي، ايران سالن کان آمريڪا جي ظالماڻين پابندين جو منهن ڏئي رهيو آهي.
هن جو چوڻ هو ته ايراني رڳو عزت جي ٻولي ڄاڻندا آهن، جيڪو فوجي ڪارروائي سان حاصل ناهي ٿي سگهيو اهو ڳالهين سان به حاصل نٿو ٿي سگهي، آمريڪا سان ڪنهن به معاهدي کان اڳ سڀ شيون واضح ٿيڻ گهرجن، موجودا ڳالهين ۾ اعتماد جي کوٽ آهي پر مون کي اُميد آهي ته حڪمت ۽ سفارتڪاري ڪامياب ٿينديون.
هڪ ٻئي سوال جي جواب ۾ ايراني پرڏيهي وزير جو چوڻ هو ته پاڪستان جي ٽياڪڙي ۾ ٿيندڙ ڳالهيون اڃا تائين ناڪام ناهن ٿيون، ان باوجود ڳالهين جي ڏکئي عمل مان گذري رهيا آهيون، ڳالهين جي عمل ۾ ڏکيائي جو وڏو اڪرڻ آمريڪي رويو ۽ اسان جي وچ ۾ موجود بي اعتمادي آهي، اسان هر ان ملڪ جي ڪوشش کي ساراهيون ٿا جيڪو مدد ڪرڻ جي صلاحيت رکي ٿو.
عباس عراقچي جو چوڻ هو ته ايران ڪڏهن به ايٽمي هٿيار حاصل ڪرڻ نٿو چاهي، 2015 جي معاهدي ۾ ثبوت ڏئي چڪا آهيون، اسان جو نيوڪليئر پروگرام پرامن مقصدن لاءِ آهي ۽ پرامن ئي رهندو.
