پئرس (ويب ڊيسڪ) فرانسيسي صدر ايمينيوئيل ميڪرون کي گذريل سال ۾ سندس گهرواري ۽ خاتون اول بريجيٽ ميڪرون طرفان جهاز ۾ چماٽ هڻڻ جو اصل ڪارڻ سامهون اچي ويو.
فرانسيسي عورت صحافي فلورين تارديوف جي نئين ڪتاب ۾ انڪشاف ڪيو ويو آهي ته خاتون اول بريجيٽ صدر ميڪرون جي موبائل فون تي ڪجهه پيغام ڏسي ورتا هئا.
ڪتاب ۾ دعويٰ ڪئي وئي آهي ته صدر ميڪرون ايراني اداڪارا گل شفتي فرحاني کي اڻ وڻندڙ ميسيج ڪيا هئا، جنهن تان جهاز ۾ صدر ۽ خاتون اول جو وڏو بحث ٿيو.
ڪتاب ۾ ڄاڻايو ويو آهي ته 48 سالن جي صدر ميڪرون جو 42 سالن جي گل شفتي فرحاني سان ڪيئي مهينن تائين لاڳاپا رهيا.
اهو به چيو ويو آهي ته هڪ پيغام ۾ صدر ميڪرون ايراني اداڪارا کي چيو هو ته ”هوءَ تمام سهڻي لڳي رهي آهي.“
رپورٽ موجب، خاتون اول جي دوست ليکڪا کي ٻڌايو ته بريجيٽ کي پيغامن کان وڌيڪ ان ڳالهه جو ڏک هو ته کيس احساس ٿيو ته کيس هوريان هوريان ميساريو پيو وڃي.
ٻئي پاسي فرانسيسي خاتون اول جي نمائندي اهڙي قسم جون دعوائون رد ڪندي چيو آهي ته بريجيٽ پنهنجي مڙس جو فون چيڪ نه ڪندي آهي.
هوڏانهن ايراني اداڪارا گل شفتي فرحاني به صدر ميڪرون سان ڪنهن به قسم جي تعلق جي ترديد ڪئي آهي.
ياد رهي ته گذريل سال مئي ۾ ويٽنام پهچڻ تي جڏهن فرانسيسي صدر جي جهاز جو در کليو ته هڪ هٿ صدر جي منهن تي لڳندي ڪيمرائن جي اک ۾ محفوظ ٿي ويو هو.
