ناهيد رانا پاڪستاني بيٽرن جا تَرا ڪڍي ڇڏيا، بنگلاديش ڍاڪا ٽيسٽ 100 رنسن تان کٽي ورتي
ڍاڪا (ويب ڊيسڪ) بنگلاديش پاڪستان کي پهرين ٽيسٽ ميچ ۾ 104 رنسن تان شڪست ڏئي ڇڏي.
ڍاڪا ٽيسٽ ۾ ناهيد رانا جي تباهه ڪندڙ بالنگ آڏو پاڪستاني بيٽنگ لائين لاءِ 268 رنسن جو هدف پهاڙ بڻجي ويو ۽ پوري ٻي اننگز ۾ 163 آئوٽ ٿي وئي.
بنگلاديش خلاف پاڪستان جي پهرين وڪيٽ 3 رنسن تي ڪِري، پاڪستان کي ٻيو نقصان اذان اويس جي صورت ۾ کڻڻو پيو جيڪو 15 رنسون ٺاهي آئوٽ ٿيو.
ان کانپوءِ شان مسعود 2، عبدالله فضل 66 ۽ سلمان آغا 26، سعود شڪيل ۽ محمد رضوان 15، 15، حسن علي هڪ جڏهن ته نعمان علي چار رنسون ٺاهي پويلين موٽي ويا.
بنگلاديش جي نوجوان فاسٽ بالر ناهيد رانا شاندار بالنگ ڪندي 5 پاڪستاني رانديگرن کي آئوٽ ڪيو، جڏهن ته تسڪين احمد ۽ تيج الاسلام 2-2 وڪيٽون ورتيون.
بنگلاديشي ڪپتان نجم الحسن شانتو کي پهرين اننگز ۾ سينچري ۽ ٻي اننگز ۾ ففٽي اسڪورڪرڻ تي پليئر آف دي ميچ قرار ڏنو ويو.
ان کان اڳ بنگلاديش راند جي پنجين ڏينهن پنهنجي ٻي اننگز 240 رنسن تي 9 رانديگر آئوٽ تي ڊڪليئر ڪري ڇڏي هئي.
بنگلاديش جي ٻي اننگز ۾ ڪپتان نجم الحسن شانتو 87 ۽ مومن الحق 56 رنسون ٺاهي نمايان رهيا.
پاڪستان جي حسن علي ۽ نعمان علي 3، 3، شاهين آفريدي 2 ۽ محمد عباس هڪ وڪيٽ ورتي.
نعمان علي ٽيسٽ ڪرڪيٽ ۾ پنهنجون 100 وڪيٽون به مڪمل ڪيون.
واضح رهي ته پاڪستان ٽاس کٽي بنگلاديش کي پهرين بيٽنگ جي دعوت ڏني هئي.
بنگلاديش پهرين اننگز ۾ 413 رنسون ٺاهيون جنهن جي جواب ۾ پاڪستاني ٽيم پنهنجي پهرين اننگز ۾ 386 رنسن تي آل آئوٽ ٿي وئي هئي.
بنگلاديش هن فتح سان ورلڊ ٽيسٽ چيمپئن شپ جي پوائنٽس ٽيبل تي پڻ اهم پوزيشن حاصل ڪري ورتي آهي.
