اسلام آباد (ويب ڊيسڪ) صدر آصف علي زرداري معرڪه حق جي پهرين سالگرهه جي موقعي تي پنهنجي پيغام ۾ چيو آهي ته وزيراعظم شهباز شريف ۽ فيلڊ مارشل سيد عاصم منير جي ڪوششن جي ڪري پاڪستان خطي ۾ توازن ۽ استحڪام جي علامت بڻجي اڀريو آهي.
ايوانِ صدر مان جاري ڪيل بيان موجب، صدر معرڪه حق جي سالگرهه تي قوم ۽ هٿياربند فوج کي ڀيٽا پيش ڪئي ۽ چيو ته ان ڪاميابي ۾ فيلڊ مارشل سيد عاصم منير جي قيادت، حڪمت عملي ۽ جرئتمنداڻي فيصلن جو بنيادي ڪردار رهيو.
هن پاڪ فضائيه جي سربراهه ايئر چيف مارشل ظهير احمد بابر سڌو ۽ پاڪ فضائيه جي اهلڪارن جي پيشيوراڻين مهارت ۽ اعليٰ صلاحيتن کي ساراهيو، جڏهن ته پاڪ بحريه جي سربراهه ايڊمرل نويد اشرف ۽ بحري فوج جي مڪمل آپريشنل تيارين کي پڻ قومي سلامتي لاءِ فخر جوڳو قرار ڏنو.
صدر زرداري چيو ته پاڪستان هڪ ذميوار ۽ امن پسند ملڪ آهي، جنهن دشمن جي جارحيت جو اثرائتو ۽ متوازن جواب ڏئي پنهنجي دفاعي صلاحيت دنيا آڏو واضح ڪئي.
هن چيو ته ڀارت جي غير قانوني قبضي هيٺ ڄمون ۽ ڪشمير جو مسئلو گڏيل قومن جي ٺهرائن پٽاندر حل ٿيڻ گهرجي ۽ پاڪستان ڪشميري عوام جي اخلاقي، سياسي ۽ سفارتي حمايت جاري رکندو.
صدر چيو ته ڀارت طرفان سنڌ طاس معاهدي کي معطل ڪرڻ جي ڪوشش آبي جارحيت جي برابر آهي، ڇاڪاڻ ته پاڻي ڪروڙين پاڪستانين جي زندگي سان جڙيل مسئلو آهي.
هن افغانستان تي زور ڀريو ته هو پنهنجي سرزمين کي پاڪستان يا خطي جي ڪنهن به ملڪ خلاف دهشتگردي لاءِ استعمال ٿيڻ نه ڏئي، جڏهن ته ٻاهرين حمايت يافتا دهشتگردي جو خاتمو خطي جي امن لاءِ اڻٽر آهي.
آصف علي زرداري چيو ته وزيراعظم شهباز شريف ۽ فيلڊ مارشل سيد عاصم منير جي ڪوششن سان پاڪستان خطي ۾ توازن ۽ استحڪام جي هڪ مضبوط علامت طور سامهون آيو آهي، جڏهن ته ايران ۽ آمريڪا جي تڪرار جي پرامن حل لاءِ پاڪستان جي سفارتي ڪوششن کي عالمي سطح تي ساراهيو ويو.
صدر وڌيڪ چيو ته پاڪستاني قوم ۽ هٿياربند فوج هر چئلينج جو مقابلو ڪرڻ ۽ ملڪ جي دفاع لاءِ مڪمل طور تي تيار آهن.
