پاڪستان جي حڪومت، ميڊيا ۽ عوام کي آمريڪي صدر ڊونلڊ ٽرمپ جي پاڪستان جي حق ۾ بيانن ۽ ٽرمپ طرفان وزيراعظم شهباز شريف ۽ فيلڊ مارشل عاصم منير جي تعريفن تي گهڻو خوش نه ٿيڻ گهرجي، ڇو ته ٽرمپ ذهني طور غير متوازن شخص آهي. آمريڪا جي فوجي، سياسي ۽ مالي اسٽيبلشمينٽ اسرائيل جي اثر هيٺ ۽ ان جي ڪنٽرول ۾ آهي. آمريڪا جو مقصد ايران جي قدرتي وسيلن تي قبضو ڪرڻ ۽ چين ڏانهن تيل جي فراهمي ۾ رنڊڪ وجهڻ آهي، ڇاڪاڻ ته چين ايراني تيل جو سڀ کان وڏو خريدار آهي. اسرائيل، ايراني رياست کي مڪمل طور تباهه ڪرڻ چاهي ٿو ۽ اتي گهرو ويڙهه پيدا ڪري ايران کي ڪيترن ئي ٽڪرن ۾ ورهائڻ ان جو بنيادي هدف آهي. آمريڪا وچ اوڀر ۾ پنهنجي پيدا ڪيل هن صورتحال مان نڪرڻ چاهي ٿو، پر اسرائيل کيس ان وقت تائين ائين ڪرڻ نه ڏيندو، جيستائين اسرائيل کي وچ اوڀر ۾ مڪمل بالادستي حاصل نه ٿئي. ايران انهيءَ مجوزه اسرائيلي بالادستي جي راهه ۾ سڀ کان وڏي رنڊڪ آهي.
آمريڪا جي معيشت ۽ ان جي عالمي مالي طاقت جو دارومدار پيٽرو ڊالر نظام تي آهي، جيڪو 1974ع ۾ قائم ڪيو ويو هو، جنهن تحت دنيا ۾ تيل جي خريد و فروخت رڳو آمريڪي ڊالر ۾ ڪئي ويندي آهي. هن نظام تحت خليجي عرب رياستن جي تيل مان حاصل ٿيندڙ آمدني آمريڪا ڏانهن وڃي ٿي. هاڻي ايران پنهنجو تيل چيني ۽ ايراني ڪرنسي ۾ وڪڻي پيٽرو ڊالر نظام کي ڪمزور ڪري رهيو آهي. چين ۽ روس برڪس جي ذريعي متبادل ڪرنسي نظام ٺاهڻ جي ڪوشش ڪري رهيا آهن ته جيئن آمريڪي ڊالر جي بالادستي ختم ٿي وڃي. آمريڪا ڊالر جي غلبو برقرار رکڻ لاءِ ڀرپور ڪوششون ڪري رهيو آهي. تنهن ڪري موجوده عالمي فوجي، اقتصادي ۽ سياسي تڪرارن ۾ آمريڪا ۽ اسرائيل جا مفاد تمام وڏا آهن، اهي پاڪستان کي امن جو ڪريڊٽ ڏيڻ لاءِ پنهنجن وڏن هدفن تان پوئتي نه هٽندا. تنهن ڪري پاڪستان جي ڪجهه ٽي وي اينڪرز ۽ تجزيه نگارن جون اهي اميدون ته پاڪستان دنيا جو مرڪز بڻجي ويو آهي، درست ناهن.
آمريڪا ۽ اسرائيل پنهنجا وڏا اسٽريٽجڪ مقصد حاصل ڪرڻ لاءِ جنگيون جاري رکندا، جڏهن ته هن وقت آمريڪا امن جي نالي تي ايران کي ڪمزور ڪرڻ چاهي ٿو ۽ ساڳئي وقت ايران تي ٻيهر حملي يا حڪومت جي تبديلي لاءِ وقت حاصل ڪرڻ چاهي ٿو. سعودي عرب جو ڊي فيڪٽو حڪمران شهزادو محمد بن سلمان به اهو نه چاهيندو ته ايران ڪمزور ٿيڻ بدران وڌيڪ مضبوط ٿي اڀري. سعودي عرب ايران کي هڪ ڪاروباري مقابلي ڪندڙ طور ڏسي ٿو. ايران هڪ وڏو ملڪ ۽ فوجي طاقت هجڻ سان گڏ علمي ۽ تهذيبي لحاظ کان به سعودي عرب ۽ ٻين خانداني عرب رياستن کان وڌيڪ مضبوط آهي، تنهن ڪري اهي حڪمران ايران کان خوفزده آهن. سعودي عرب ۽ ٻيون خليجي عرب رياستون آبنائي هرمز تي ايران جو ڪنٽرول قبول نه ڪنديون ۽ نه ئي ايران تي لڳل پابندين جي مڪمل خاتمي جي حمايت ڪنديون. تيل ۽ گئس جي وڏي فراهم ڪندڙ طور ايران جي مڪمل فعال ٿيڻ سان انهن عرب رياستن کي نقصان ٿيندو، جيڪي گذريل 47 سالن کان ايران تي مغربي پابندين سبب وڏي دولت ڪمائي چڪيون آهن.
ايران جي معلوم قدرتي وسيلن جي ماليت لڳ ڀڳ 27 کان 28 ٽريلين ڊالر آهي، جڏهن ته سعودي عرب جي وسيلن جي ماليت لڳ ڀڳ 34 ٽريلين ڊالر آهي. سعودي عرب وٽ 267 ارب بيرل کان وڌيڪ تيل جا ذخيرا آهن، جڏهن ته ايران وٽ لڳ ڀڳ 210 ارب بيرل تيل جا ذخيرا آهن. دنيا جي دريافت ٿيل قدرتي گئس جو لڳ ڀڳ 17 سيڪڙو ايران ۾ موجود آهي. ڏکڻ ايران ۾ فارس گئس فيلڊ قطر تائين پکڙيل آهي. آمريڪا جو ويجهو اتحادي هجڻ ڪري قطر جي حڪمران خاندان گئس جي وڪري مان وڏي دولت حاصل ڪئي آهي، جڏهن ته آمريڪي پابندين سبب ايران ايتري گئس برآمد نه ڪري سگهيو آهي جيتري هو ڪري سگهي ٿو. ايران ۾ ٻين معدني وسيلن جي ماليت 100 ٽريلين ڊالر کان وڌيڪ آهي.
اڄ ايران سان جيڪو ڪجهه ٿي رهيو آهي، ساڳيو ئي ڪجهه 73 سال اڳ برطانيا ۽ آمريڪا ايران سان ڪيو هو، جڏهن آگسٽ 1953ع ۾ ايران جي مقبول وزيراعظم ڊاڪٽر محمد مصدق جي حڪومت کي برطانيا ۽ آمريڪا جي ڳجهين ايجنسين آپريشن ايجڪس ذريعي ختم ڪيو هو، جنهن جو مقصد ايران جي تيل تي قبضو ڪرڻ هو. ڪيترائي ماڻهو ايران جي اسلامي حڪومت کي رڳو ملن جي حڪومت سمجهن ٿا، پر حقيقت ۾ اسلامي انقلاب عالمي قوتن جي سازشن جو ردعمل هو. ايران جي آمريڪا مخالفت جو سبب به برطانيا ۽ آمريڪا طرفان ايران جي وسيلن تي ڪنٽرول رهيو آهي.
اولهه گذريل 115 سالن کان ايران جي تيل، گئس ۽ ٻين وسيلن تي قبضو ڪرڻ چاهي ٿو. ٻي عالمي جنگ کان اڳ برطانيا ڪوشش ڪئي ته ايراني تيل جرمني جي هٿ نه لڳي. پوءِ سرد جنگ دوران آمريڪا ۽ برطانيا شاهه ايران رضا شاهه پهلوي ذريعي ايران جي وسيلن تي ڪنٽرول حاصل ڪيو ۽ ايران کي سوويت يونين خلاف استعمال ڪيو. هاڻي آمريڪا ۽ يورپ چين جي توانائي فراهمي ۾ رڪاوٽ وجهڻ چاهين ٿا، ڇو ته چين جي معيشت وچ اوڀر، روس ۽ وينزويلا جي تيل تي دارومدار رکي ٿي. ايران جو 90 سيڪڙو تيل چين خريد ڪري ٿو، تنهن ڪري آمريڪا ايران جي تيل تي قبضو ڪري چين کي توانائي جي فراهمي ڪنٽرول ڪرڻ چاهي ٿو.
1913ع ۾ برطانيا ايران جي تيل ڪمپني ۾ 51 سيڪڙو حصص حاصل ڪيا. 1925ع ۾ پهلوي خاندان برطانيا جي مدد سان اقتدار ۾ آيو. 1933ع ۾ رضا شاهه پهلوي برطانوي ڪمپني کي وڌيڪ رعايتون ڏنيون، جنهن سان برطانيا کي ايران جي تيل تي 95 سيڪڙو ڪنٽرول حاصل ٿي ويو1951ع ۾ ڊاڪٽر محمد مصدق وزيراعظم بڻيو ۽ ايران جي تيل کي قومي ملڪيت بڻايو. برطانيا هن قدم تي سخت ناراض ٿيو ۽ ايران جو بحري گهريرو ڪيو. پوءِ برطانيا ۽ آمريڪا گڏجي مصدق حڪومت خلاف سازش ڪئي، احتجاج ڪرايا پروپيگنڊا ڪيو ۽ آخرڪار 1953ع ۾ بغاوت ذريعي حڪومت ختم ڪئي وئي. ان کان پوءِ شاهه پهلوي آمريڪا جو ويجهو اتحادي بڻجي ويو ۽ 26 سال ايران تي سخت حڪمراني ڪئي، پر آخرڪار 1979ع جي اسلامي انقلاب شاهه جي اقتدار کي ختم ڪري ڇڏيو.
انقلاب کان پوءِ ايران ۽ آمريڪا ۾ تڪرار جاري آهي ۽ آمريڪا ايران خلاف اقتصادي، تجارتي ۽ فوجي پابنديون لاڳو ڪيون. عراق ذريعي ايران تي جنگ به ڪرائي وئي. ايران خلاف فرقيواراڻي پروپيگنڊا به ڪئي وئي ته جيئن مسلمان گڏجي آمريڪا کي چئلينج نه ڪن. ايران فلسطين لاءِ اسرائيل خلاف قدم کنيا، جنهن سبب اسرائيل ايران کي پنهنجو وڏو دشمن سمجهي ٿو. آمريڪا ۽ اسرائيل ايران کي ڪمزور ڪرڻ لاءِ مختلف طريقا استعمال ڪيا، جن ۾ اقتصادي پابنديون، ڪرنسي کي ڪمزور ڪرڻ ۽ تعليمي پابنديون شامل آهن.
2026ع ۾ ايران تي وڏي حملي جي شروعات ڪئي وئي، پر ايران پنهنجي دفاعي صلاحيت سان آمريڪا ۽ اسرائيل کي حيران ڪري ڇڏيو. هاڻي صورتحال اها آهي ته ڪيترائي ايجنٽ پڪڙيا ويا آهن ۽ ايران جي ميزائلن ۽ ڊرونز حمله آور قوتن کي وڏو نقصان پهچايو آهي. تنهن ڪري آمريڪا ۽ اسرائيل کي هاڻي جنگ ۾ ٿورو وقفو گهربل آهي ته جيئن هو پاڻ کي ٻيهر منظم ڪري سگهن، پر ان باوجود اهي ايران خلاف جنگ ختم نه ڪندا.
