آمريڪي سامراج پنھنجي ناجائز غاصباڻي قبضي کي برقرار رکڻ لاءِ دنيا جي امن، خوشحالي، ترقيءَ کي قربانيءَ جو ٻڪرو بنائڻ لاءِ تيار آھي. آمريڪا ۽ سندس ساٿاري اسرائيل وچ اوڀر کي هڪ ڀيرو ٻيهر سخت بحران جي باهه ۾ اڇلائي ڇڏيو آهي. ھرمز لنگهه ٻاھران سمنڊ ۾ آمريڪا جي ناڪا بندي سامونڊي پاڻي جي عالمي قانون جي سراسر خلاف ھئي، ھڪ سامونڊي قزاق واري ڪارروائي ھئي. آمريڪي ناڪابندي لاءِ ڪوڙو جواز پيش ڪيو تھ ايران ھرمز لنگهه تان ٽيڪس وٺي پيو، ان ڪري مون ناڪا بندي ڪئي آھي.
17 اپريل تي ايران طرفان ھرمز لنگهه واپاري جھازن لاءِ کولڻ جي اعلان کان پوءِ آمريڪا جو اھو ڪوڙو جواز ختم ٿي ويو، پر پوءِ بھ آمريڪا جي طرفان جھازن جي ناڪابندي جاري رکڻ جو اصل سبب عالمي بالادستي ۽ قبضي کي برقرار رکڻ جي ھڪ ڪوشش آھي ۽ ايران جي ويجھو پنھنجيون فوجون گڏ ڪرڻ جو جواز قائم رکڻ آھي. آمريڪا جي ھن قبضاگيريءَ، غنڊا گرديءَ، قزاقيءَ واري عمل جو مقصد امن قائم ڪرڻ نه پر وچ اوڀر ۽ دنيا کي عدم استحڪام طرف ڌڪڻ آهي. لبنان ۽ اسرائيل وچ ۾ آمريڪي سرپرستيءَ هيٺ ٿيل ڏهن ڏينهن جي عارضي ٺاهه ڪرائڻ مان اھو تاثر مليو تھ آمريڪا ايران سان معاملا حل ڪرڻ چاھي ٿو، پر آمريڪا جي ناڪابندي، ايراني جھازن کي قبضي ۾ وٺڻ جي ڌمڪين مان ثابت ٿي ويو آھي تھ رڳو لبنان ۽ اسرائيل جي وچ ۾ جنگ بندي ھڪ جنگي ۽ سفارتي چال آھي ، ھڪ طرف فوجي قوت کي گڏ ڪرڻ لاءِ وقت حاصل ڪري سگھجي، ٻي پاسي سفارتي طرح اھو تاثر ڏجي تھ آمريڪا ھاڻ وڌيڪ جنگ نھ چاھي ۽ ھن معاملي مان نڪرڻ ٿو چاھي. آمريڪا جو اھو اندازو ھو تھ ايران لبنان اسرائيل جنگ بندي کانپوءِ بھ ھرمز لنگهه نھ کوليندو ۽ آمريڪا کي اھو موقعو ملي ويندو تھ سڄي دنيا آڏو اھو ڊرامو ڪري تھ آمريڪا امن قائم ڪرڻ چاھي ٿو، پر ايران امن جو مخالف آھي. نتيجي ۾ ايران تي دنيا جو دٻاءُ وڌندو، پر ايران آمريڪا جي اھا خطرناڪ حڪمت عملي ۽ چال سمجھندي، ھرمز لنگهه کي کولڻ جو اعلان ڪري دنيا آڏو پيغام موڪليو تھ ايران دنيا جي خوشحالي جي خلاف نھ آھي. آمريڪا ڏٺو تھ جڏھن ايران تي دٻاءُ وجھڻ واري سندس شيطاني حڪمت عملي ناڪام ٿي آھي تھ سفارتڪاريءَ جو چوغو لاھي ڦٽو ڪيائين. ھڪ عالمي غنڊو ۽ دھشتگرد طور سامونڊي ناڪابندي جاري رکڻ جو اعلان ڪيائين.
هرمز جو سامونڊي لنگهه رڳو پاڻيءَ جو هڪ لنگهه يا جاگرافيائي سرحد ناهي؛ هي عالمي سرمائيداري جي سڀ کان اهم شريان ۽ پيٽرو-ڊالر سسٽم جي جياپي جو مرڪز آهي، جتان دنيا جي ويهن سيڪڙو تيل جو گذر ٿئي ٿو. ايران طرفان آمريڪا جي غيرقانوني ۽ ظالماڻي بحري ناڪابندي جي جواب ۾ هن لنگهه کي بند ڪرڻ جو فيصلو ڪو جذباتي يا جارحاڻو قدم ناهي، پر اهو آمريڪي دٻاءُ ۽ استحصال خلاف هڪ مضبوط، جائز ۽ عملي مزاحمتي هٿيار آهي. ايران جي اها دفاعي حڪمت عملي ثابت ڪري ٿي ته قومون پنهنجي جاگرافيائي اهميت کي سامراجي بدمعاشي جي ٽوڙ لاءِ ڪيئن استعمال ڪري سگهن ٿيون.
آمريڪي سامراج جون معاشي پابنديون ۽ بحري ناڪابنديون اصل ۾ نئين دور جي والار ۽ غاصباڻي نظام جا اوزار آهن، جن جو اڪيلو مقصد، آزاد ۽ خودمختيار قومن جو معاشي ساهه مٺ ۾ ڪرڻ آهي، جنھن جو تازو مثال وينزويلا ۾ تيل جي ٻن جھازن تي قبضو ڪري، انھن جھازن کي عالمي مارڪيٽ ۾ وڪڻي ڇڏڻ آھي. عالمي ميڊيا ذريعي آمريڪا نفسياتي جنگ وڙھي رهيو آهي، جنھن جا مثال ٽرمپ ۽ ٻين آمريڪي عھديدارن جا بيان آھن. آمريڪي سامراج جي اڳواڻ ڊونلڊ ٽرمپ جي سياسي منافقت، هٺ ڌرمي ۽ تڪبر ان وقت پوري طرح وائکو ٿيو جڏهن هن سي بي ايس نيوز تي انتهائي بي شرميءَ سان اها ڪوڙي دعويٰ ڪئي ته ايران زميني فوج جي مداخلت کان سواءِ ئي پنهنجي طاقتور يورينيم کي پرڏيهه منتقل ڪرڻ ۽ آمريڪا حوالي ڪرڻ جي شرطن تي راضي ٿي ويو آهي. هي بيان رڳو پنهنجي سامراجي خوف کي لڪائڻ، عالمي دنيا کي دوکو ڏيڻ ۽ عوامي راءِ کي گمراهه ڪرڻ جي هڪ ناپاڪ سازش آهي .
ايراني قيادت، خاص طور تي پارليامينٽ جي اسپيڪر محمد باقر قاليباف، ٽرمپ جي انهن بي بنياد دعوائن کي سوشل ميڊيا پليٽ فارم ايڪس (ٽيوٽر) تي سختي سان رد ڪندي ثابت ڪيو آهي ته ايران پنهنجي خودمختياري ۽ قومي وقار جو ڪڏهن به سودو نه ڪندو. ايئر فورس ون جهاز مان ٽرمپ جون اهي کليون ڌمڪيون، ته جيڪڏهن ايران شرط نه مڃيا ته آمريڪا ٻيهر بمباري شروع ڪندو، دراصل آمريڪا جي ان خوني حڪمت عملي کي بي نقاب ڪن ٿيون، جتي هو سفارتڪاريءَ جي بجاءِ طاقت جي زور تي اھو تاثر قائم رکڻ چاھي ٿو تھ سندس شرط مڃو ڇاڪاڻ ھو دنيا جو سڀ کان وڏو وحشي آھي.
هڪ طرف آمريڪا آهي جيڪو بحري قزاقي ڪري، عالمي واپار کي يرغمال بڻائي رهيو آهي، جنهن جي نتيجي ۾ ٽيڪساس اي اينڊ ايم يونيورسٽي جي ماهر جان پال روڊريگ موجب خوف ۽ گمراهه ڪندڙ معلومات سبب لڳ ڀڳ ڏهن تجارتي جهازن کي لنگهه تان واپس موٽڻو پيو آهي. ٻئي طرف ايران آهي، جيڪو قبضاگير قوتن کي پنهنجي حدن کان پري رکڻ لاءِ يو ڪي ايم ٽي او جي رپورٽن موجب سخت قدم ته کڻي ٿو، پر گڏوگڏ ملائيشيا، چين، ڏکڻ ڪوريا ۽ ٻين دوست ملڪن جي جهازن کي بنا ڪنهن رنڊڪ جي گذرڻ جي خاص اجازت ڏئي ٿو .
ايران جي اها بااصول سفارتڪاري ثابت ڪري ٿي ته سندس مزاحمت رڳو استحصالي قوتن جي خلاف آهي، نه ڪي پرامن واپار جي خلاف. جيتوڻيڪ ڀارتي پرڏيهي وزارت جي سيڪريٽري وڪرم مسري پنهنجن جهازن واري واقعي تي ايراني سفير کي طلب ڪري ڳڻتي جو اظهار ڪيو، پر ايران پنهنجا لاڳاپا پنهنجي شرطن، قومي سلامتي ۽ باهمي ڀائيچاري جي بنياد تي ئي برقرار رکيا آهن .
ايراني هٿياربند فوج جي دفاعي حڪمت عملي ڪا انڌي جارحيت ناهي، پر اها پنهنجي جاگرافيائي ۽ قومي بقا جي دفاع لاءِ وڙهي ويندڙ حق ۽ سچ جي جنگ آهي. خاتم الانبيا سينٽرل هيڊڪوارٽر جي ترجمان اعلان ڪيو آھي ته ھرمز لنگهه جو ڪنٽرول ايراني فوج جي مضبوط انتظام هيٺ پنهنجي اڳوڻي حالت ۾ آهي، ايران جي بهادر فوج ۽ اسلامي انقلابي گارڊ ڪور کليل لفظن ۾ آمريڪي ڪاررواين کي واعدن جي ڀڃڪڙي، بحري قزاقي ۽ کليل ڦرلٽ قرار ڏنو آهي.
الجزيره جي رپورٽر جي تجزيي موجب، ھرمز لنگهه ۾ پيدا ٿيل ان غير يقيني واري صورتحال جو ذميوار سڌو سنئون آمريڪا آهي، ۽ جيستائين هو پنهنجي قبضاگير حڪمت عملي نٿو ڇڏي، خطي ۾ امن ناممڪن آهي. ايران جي مزاحمتي حڪمت عملي رڳو فوجي محاذ تائين محدود ناهي، پر ان ۾ هڪ ناقابلِ شڪست سياسي ۽ سفارتي پختگي پڻ شامل آهي. ايران جا بنيادي ۽ پختا مطالبا آهن ته مڙهيل جنگ جو مڪمل خاتمو ڪيو وڃي، مستقبل جي سلامتي جي ضمانت ڏني وڃي، غيرقانوني معاشي پابنديون ختم ڪيون وڃن، ايٽمي پروگرام جو تحفظ ڪيو وڃي ۽ سامراجي بئنڪن ۾ منجمد ڪيل قومي اثاثا فوري طور تي بحال ڪيا وڃن.
اهي مطالبا ڪنهن شڪست کاڌل يا ڪمزور ڌر جا نه پر هڪ اهڙي باوقار قوم جا آهن، جيڪا ڄاڻي ٿي ته آمريڪي صدر ڊونلڊ ٽرمپ جي عارضي جنگبندي جو معاهدو ختم ڪرڻ ۽ ٻيهر بمباري ڪرڻ واري وحشياڻي ڌمڪي مايوسي ۽ زوال واري صورتحال ۾ رڳو سامراج جي قبضي برقرار رکڻ جي ڪوشش آهي. ايران پنهنجي قومي وقار جو سودو ڪرڻ لاءِ ڪنهن به قيمت تي تيار ناهي، ۽ اها ئي بي خوف دفاعي ۽ سياسي مزاحمت والاريل قوتن ۽ سامراجي ڍانچي جي حتمي شڪست جو سبب بڻجندي.
