اسلام آباد (ويب ڊيسڪ) پاڪستان تحريڪِ انصاف (پي ٽي آءِ ) پيٽروليم شين جي اگهن ۾ واڌ خلاف اپوزيشن جماعتن جي آل پارٽيز ڪانفرنس(اي پي سي) بلائڻ جو اعلان ڪري ڇڏيو آهي، جيڪا آچر ڏينهن لاهور ۾ ٿيندي.
پي ٽي آءِ چيئرمين بئريسٽر گوهر، تيمور سليم ۽ اخونزادا حسين يوسفزئي خيبرپختونخوا هائوس ۾ پريس ڪانفرنس دوران پيٽروليم شين جي اگهن ۾ واڌ خلاف اي پي سي سڏائڻ جو اعلان ڪيو.
بئريسٽر گوهر چيو ته اڄ اسان جو ون پوائنٽ ايجنڊا آهي، پيٽروليم شين جي اگهن ۾ واڌ سان عام پاڪستاني ۽ غريب آبادگار سخت متاثر ٿئي ٿو.
هن چيو ته حڪومت غير ضروري طور تي اگهن ۾ واڌ ڪئي آهي، دنيا جي 96 ملڪن ۾ پيٽروليم اگهن ۾ واڌ ٿي، پر ويٽنام کان پوءِ پاڪستان ۾ سڀ کان وڌيڪ واڌ ٿي ۽ نائيجيريا کي به پوئتي ڇڏي ڏنو آهي، حڪومت آءِ ايم ايف سان معاهدا ڪرڻ ۾ ناڪام رهي آهي.
هن وڌيڪ چيو ته حڪومت انتظاميا ۾ ناڪام رهي ۽ منصوبابندي جي کوٽ هئي، شاهي خرچن سبب پيٽروليم ليوي گهٽ نه ٿي سگهيو، ۽ حڪومت عوام سان ڌوکو ڪيو آهي.
بئريسٽر گوهر وڌيڪ چيو ته ڪي پي ۾ 14 لک ۽ سڄي ملڪ ۾ 25 لک کان وڌيڪ موٽر سائيڪلون آهن، حڪومت ڪرپشن جو نئون دروازو کولي ڇڏيو آهي، هن عالمي برادري کي پڻ اپيل ڪئي ته هن جنگ کي روڪيو وڃي.
