لاهور (بيورو) موسمياتي تبديلي جي وفاقي وزير مصدق ملڪ ۽ وفاقي مملڪتي وزير بلال اظهر ڪياني لاهور جي الحمرا هال ۾ ٿِنڪ فيسٽ جي آخري ڏينهن تي پاڪستان ۾ ترقي ۽ غربت ڇو؟ جي موضوع تي هڪ سيشن کي خطاب ڪيو. مصدق ملڪ چيو ته ڪجهه ماڻهن سماج مان اميدون کسي ورتيون آهن، ۽ جيڪڏهن عام ماڻهو جي ڳالهه نه ڪئي وڃي ته سڀ ڪجهه بي معنيٰ آهي. هن وڌيڪ چيو ته پيداوار ۽ برآمدات وڌائڻ لاءِ خدشن کي ختم ڪرڻ گهرجي، ۽ تعليم، صحت ۽ اعليٰ تعليم ۾ سيڙپڪاري کي ترجيح ڏيڻ گهرجي. مملڪتي وزير بلال اظهر ڪياني چيو ته سياسي معيشت اصل مسئلو آهي ۽ حڪومت ايندڙ پنجن سالن ۾ ڪسٽم ڊيوٽي گهٽائيندي. هن چيو ته آءِ ايم ايف پروگرام معيشت کي مستحڪم ڪيو آهي، ۽ پرڏيهي مٽاسٽا جي ذخيرن جي گهٽتائي جي ڪري، دفاعي خرچن لاءِ قرض وٺڻ ضروري آهي. بلال اظهر ڪياني چيو ته پنجاب ٻين صوبن جي ڀيٽ ۾ بهتر ترقي ڪري رهيو آهي، ۽ ملڪ جي ترقي تعليم ۾ بهتري ۽ آبادي تي ڪنٽرول کانسواءِ ممڪن ناهي. هن چيو ته وفاقي حڪومت سڌارن لاءِ پرعزم آهي ۽ انهن جا دروازا سڀني لاءِ کليل آهن.
