ڪابل(ع آ نيوز) افغان طالبان جي اعليٰ قيادت ۾ سخت اندروني اختلاف سامهون آيا آهن ۽ اهو چيو پيو وڃي ته افغانستان ۾ طالبان حڪومت هاڻي اثرائتي طور تي ٻن ڌڙن ۾ ورهايل آهي. برطانوي براڊڪاسٽنگ ڪارپوريشن (بي بي سي) جي هڪ تازي جاچ رپورٽ موجب، طالبان اڳواڻ هيبت الله اخوندزاده جي هڪ ليڪ ٿيل آڊيو ڪلپ ۾، هن کي خبردار ڪندي ٻڌو وڃي ٿو ته اندروني ورڇ اسلامي امارت جي خاتمي جو سبب بڻجي سگهي ٿي. بي بي سي جي مطابق، طالبان قيادت ٻن واضح ڌڙن ۾ ورهايل آهي. قندار ۾ گروپ هيبت الله اخوندزاده جي اڳواڻي ۾ آهي، جيڪو هڪ سخت گير اسلامي امارت تي يقين رکي ٿو. انهن جو نظريو هڪ اهڙي نظام جو آهي جيڪو جديد دنيا کان ڪٽيل هجي، جتي سماج تي مڪمل ڪنٽرول مذهبي شخصيتن ذريعي برقرار رکيو وڃي. هي ڌڙو عورتن جي تعليم ۽ روزگار جي سخت مخالفت ڪري ٿو، ۽ جديد ٽيڪنالاجي، خاص طور تي انٽرنيٽ، کي اسلامي قدرن لاءِ خطرو سمجهيو ويندو آهي. اخوندزاده ڪابل مان سيڪيورٽي فورسز ۽ هٿيارن جي ورڇ، قنڌار کي طاقت جو مرڪز بڻائڻ جهڙا اهم فيصلا پڻ ڪيا آهن.ان جي ابتڙ، ڪابل ۾ ڌڙو نسبتاً عملي سمجهيو ويندو آهي، جنهن ۾ گهرو وزير سراج الدين حقاني، دفاع وزير ملا يعقوب ۽ نائب وزيراعظم عبدالغني برادر جهڙا طاقتور اڳواڻ شامل آهن. هي گروهه افغانستان لاءِ هڪ خليج جهڙو ماڊل چاهي ٿو جيڪو معاشي طور تي سرگرم هجي ۽ اسلامي سڃاڻپ سان گڏ بين الاقوامي برادري سان لاڳاپا رکي. انهن اڳواڻن جو خيال آهي ته واپار، سفارتڪاري ۽ رياستي ڪمن کان سواءِ ملڪ هلائڻ ممڪن ناهي، اهو ئي سبب آهي ته هي گروهه جديد ٽيڪنالاجي ۽ ڇوڪرين لاءِ محدود تعليم جي به حمايت ڪري ٿو. بي بي سي جي رپورٽ ۾ اهو به چيو ويو آهي ته هيبت الله اخوندزاده جو ڪردار وقت سان گڏ خاص طور تي تبديل ٿي چڪو آهي. هو 2016 ۾ هڪ مذهبي عالم جي حيثيت سان چونڊيو ويو هو جيڪو مختلف ڌڙن جي وچ ۾ اتفاق راءِ پيدا ڪري سگهي ٿو، پر اقتدار ۾ اچڻ کان پوءِ هو هڪ آمرانه حڪمران بڻجي ويو.
