عمران خان گهرڀاتين سان سياست تي نه ڳالهائي: راڻا ثناءُ الله

اسلام آباد(م ڊ)  وزيراعظم جي سياسي معاملن بابت صلاحڪار  راڻا ثناءٌ الله چيو آهي ته عمران خان جو حق آهي ته هو پنهنجي خاندان ۽ وڪيلن سان ملاقات ڪري، پر سياست تي ڳالهائڻ جي اجازت نٿي ڏني وڃي سگھي. خانگي ٽي وي سان ڳالهيون ڪندي هن چيو ته علي امين گنڊاپور ڪجهه ڪم ڪرڻ کان انڪار ڪيو هو، جنهن جي نتيجي ۾ ان کي هٽائي سهيل آفريدي کي مقرر ڪيو ويو آهي. رانا ثناءُ الله چيو ته جيل جا قاعدا 265 ۾ واضح طور تي لکيل آهي ته ملاقاتن دوران سياست جو تذڪرو ناهي ٿي سگھندو. عمران خان جي ڀيڻ سان هڪ ڪلاڪ تائين ملاقات ٿي. هن وڌيڪ چيو ته عمران خان جي صحت بلڪل ٺيڪآهي، ۽ڀيڻ سان ملاقات کان اڳ، ان جي زال بشري بي بي سان پڻ ملاقات ٿي آهي. رانا ثناء الله ٻڌايو ته اڄ ملاقات لاءِ سپرنٽينڊنٽ اڊيالا جيل طرفان شرط رکيو ويو هو ته عظمي خان عمران خان سان ملاقات کانپوءِ پريس ڪانفرنس نٿيون ڪري سگھي.

1. عمران جون ڀينرون  سياسي  پيغام کڻي ويون ته ملاقاتون نه ٿينديون:فيصل واوڊا

اسلام آباد (بيورو رپورٽ) سينيٽر فيصل واوڊا چيو آهي ته عمران خان جي ڀينرن سان ملاقات سندس حق آهي، ڇو ته اهي غير سياسي آهن، کين اهو حق ملڻ گهرجي. ايڪس تي جاري ڪيل بيان ۾ فيصل واوڊا چيو ته مان ڪالهه توهان کي مشورو ڏنو هو، اڄ توهان کي فائدو ٿي ويو، ٻه قدم پوئتي هڪ قدم اڳتي ٿيڻ سان ئي سياسي رستو نڪرندو آهي.هن چيو ته خيبر پختونخواهه جي وڏي وزير اڊيالا ۽ اسلام آباد تي ڪاهه نه ڪري سٺو قدم کنيو، ڀيڻون غير سياسي آهن، جن کي پي ٽي آءِ باني سان ملاقات جو حق ملي ويو پر جيل ۾ سياسي ملاقاتون ممڪن ناهن.سندس چوڻ هو ته ميران شاهه ۾ اسان جي بهادر آفيسر کي بي رحمي سان شهيد ڪيو ويو، جنهن جي ذميواري ڪي پي جي وڏي وزير تي لاڳو ٿئي ٿي، هو ميران شاهه ۾ پنهنجي شهيد آفيسر جي گهر ڀاتين جو داد فرياد ڪري، گورنر کي به اها ئي درخواست آهي ته وڃي ۽ شهيدن کي عزت بخشي.