ڪراچي ( رپورٽر) سنڌ جي وڏي وزير سيد مراد علي شاهه نون صوبن جي قيام بابت ٿيندڙ بحث کي مڪمل طور تي رد ڪندي چيو نون صوبن جي ڳالهه هڪ ڪن کان ٻڌو ۽ ٻئي ڪن کان ڪڍي ڇڏيو، سواءِ الله جي ڪنهن وٽ به سنڌ کي ورهائڻ جي طاقت ناهي. هي ڳالهه هن پورٽ گرانڊ ۾ منعقد ٿيل سنڌ ڪرافٽ فيسٽيول دوران ميڊيا سان ڳالهائيندي ڪئي ۽ صوبائي حڪومت جي سنڌ جي روايتي هنر ۽ دستڪاري کي هٿي ڏيڻ واري عزم تي زور ڏنو. وڏي وزير چيو اسان جو ڌيان اهو يقيني بڻائڻ تي آهي ته سنڌ جي ثقافتي ڪم ۽ دستڪاري کي اها سڃاڻپ ۽ حوصلا افزائي ملي جنهن جو اهي حقدار آهن. نون صوبن جي قيام بابت ٻيهر اُڀرندڙ بحث تي تبصرو ڪندي هن چيو ته اھو بحث مڪمل طور رد ڪرڻ گهرجن. نون صوبن جي ڳالهه هڪ ڪن کان ٻڌو ۽ ٻئي ڪن کان ڪڍي ڇڌيو. ۽ وڌيڪ چيو سواءِ الله جي ڪنهن وٽ سنڌ کي ورهائڻ جي طاقت ناهي. مراد علي شاهه چيو ته پيپلز پارٽي جي چيئرمين بلاول ڀٽو زرداري اڳ ۾ ئي ارڙهين ترميم ۾ تبديلي ۽ اين ايف سي ايوارڊ ۾ حصي ۾ گھٽتائي جون تجويزون رد ڪري چڪا آهن. هن وڌيڪ چيو اهي معاملا تجويز ڪيل 27هين ترميم تحت پڻ رد ڪيا ويا هئا. وڏي وزير زور ڏنو ته پيپلز پارٽي ڄاڻي ٿي ته خوابن کي حقيقت ۾ ڪيئن تبديل ڪجي ۽ پارٽي جي ترقياتي ويزن ۽ حڪمراني واري انداز کي نمايان ڪيو. سنڌ جي نئين گورنر جي مقرري بابت سوال تي مراد علي شاهه واضح ڪيو ته نه ته هو ۽ نه ئي صوبائي حڪومت ان فيصلي ۾ شامل هئي. هن چيو گورنر جي مقرري وقت اسان کي صلاح مشوري ۾ شامل نه ڪيو ويندو آهي. پنهنجي پس منظر بابت ڳالهائيندي هن چيو مان هڪ وڪيل جو پٽ آهيان ۽ گهڻو وقت بهترين وڪيلن جي صحبت ۾ گذاريو آهي، جيڪڏهن ڪنهن کي دليل پيش ڪرڻو هجي، عدالتون موجود آهن. جيڪي قانوني رستي کان هٽي پنهنجو ڪم ڪن ٿا انهن تي تنقيد ڪندي هن چيو بغير عدالت وڃڻ جي اهي وڪيل جيان رويو اختيار ڪندا آهن. قانون ۽ نظم و نسق بابت ڳالهائيندي وڏي وزير ننڍن گروپن پاران عوامي زندگي ۾ خلل وجهڻ تي مايوسي ظاهر ڪئي۔ 50 کان 150 ماڻهو سڄو شهر اغوا ڪري ويٺا آهن. جڏهن رستا بار بار بند ٿين ٿا حڪومت کي يقيني طور قدم کڻڻو پوندو. وڏي وزير ٻيهر چيو ته پيپلز پارٽي اڳ ۾ ڪجهه معاملن لاءِ عمر جي حد مقرر ڪري چڪي هئي ۽ عدالت جي هدايتن کان پوءِ حڪومت پنج سال جي رعايت ڏني. هن چيو عدالت اسان کان پڇيو ۽ اسان پنج سال جي عمر جي رعايت ڏيڻ تي عمل ڪيو.
