آڪلينڊ (ويب ڊيسڪ) ويسٽ انڊيز، نيوزيلينڊ کي پهرين ٽي ٽوئنٽي ميچ ۾ سخت مقابلي کان پوءِ ست رنسن تان شڪست ڏئي پنجن ميچن جي سيريز ۾ 0-1 جي سرسي حاصل ڪري ورتي.
آڪلينڊ جي ايڊن پارڪ ۾ ڪيوي ڪپتان مچل سينٽنر ٽاس کٽي پهريان بالنگ جو فيصلو ڪيو.
ويسٽ انڊيز پهريان بيٽنگ ڪندي مقرر 20 اوورن ۾ ڇهن وڪيٽن جي نقصان تي 164 رنسون ٺاهيون، ڪپتان شاءِ هوپ 53، رومين پائول 33 ۽ روسٽن چيز 28 رنسون ٺاهي آئوٽ ٿيو.
نيوزيلينڊ طرفان جيڪب ڊفي ۽ زيڪ فالڪس ٻه، ٻه وڪيٽون ورتيون، جڏهن ته ڪائل جميسن ۽ جميز نيشام هڪ، هڪ وڪيٽ حاصل ڪئي.
نيوزيلينڊ 165 رنسن جي هدف پٺيان ڊوڙندي مقرر اوورن ۾ نوَ وڪيٽن جي نقصان تي 157 رنسون ٺاهي سگهي.
اوپنر ٽِم روبنسن 27 ۽ ڊيون ڪانوي 13 رنسون ٺاهي پويلين موٽيا، ٻين رانديگرن ۾ راچن رويندرا 21، مارڪ چيپمين 7، ڊيرل مچل 13، مائيڪل بريسويل 1 ۽ جميز نيشام 11 رنسون ٺاهيون.
ڪپتان مچل سينٽنر ناٽ آئوٽ 55 رنسن جي مزاحمتي اننگز کيڏي، پر ٽيم کي ڪاميابي نه ڏياري سگهيو ۽ نيوزيلينڊ ستن رنسن تان ميچ هارائي وئي.
ويسٽ انڊيز جي جيڊن سيلز ۽ روسٽن چيز 3، 3 وڪيٽون ورتيون، جڏهن ته ميٿيو فورڊي، رومارئيو شيفرڊ ۽ عقيل حسين جي حصي ۾ هڪ، هڪ وڪيٽ آئي.
آل رائونڊر ڪارڪردگي تي روسٽن چيز کي پليئر آف دي ميچ قرار ڏنو ويو.
